بنگلادیشی آل راؤنڈر شکیب الحسن پاکستان کیخلاف پہلے ٹیسٹ سے بھی باہر

ڈھاکہ (اردو پوائنٹ تازہ ترین اخبار ۔ 24 نومبر 2021ء ) بنگلادیش کے آل راؤنڈر شکیب الحسن پاکستان کےخلاف پہلا ٹیسٹ میچ سے بھی باہر ہوگئے۔ شکیب الحسن تاحال ہیم سٹرنگ انجری سے چھٹکارا حاصل نہیں کرسکے ہیں جس کی وجہ سے وہ 26 نومبر سے شیڈول پہلے ٹیسٹ سے باہر ہوگئے ہیں۔ ٹی ٹونٹی ورلڈکپ کے دوران ہیمسٹرنگ سرجری کا شکار ہونے والے شکیب الحسن میگا ایونٹ سے بھی باہر ہوگئے تھے جب کہ وہ پاکستان اور بنگلادیش کے درمیان ٹی ٹونٹی سیریز میں بھی حصہ نہیں لے سکے۔

(جاری ہے)

بنگلادیش کرکٹ ٹیم کی سلیکشن کمیٹی نے ان کانام پہلے ٹیسٹ کے لیے سکواڈ میں شامل کیا تھا اور ان کی شمولیت کو فٹنس سے بھی مشروط رکھا گیا تھا۔ بنگلادیش کرکٹ بورڈ کے چیف سلیکٹر کی جانب سے بھی شکیب الحسن کی عدم دستیابی کی تصدیق کی گئی ہے جب کہ ان کی دوسرے ٹیسٹ میں بھی دستیابی فٹنس سے مشروط ہے۔ پاکستان اور بنگلادیش کے درمیان دوسرا ٹیسٹ میچ 4 دسمبر سے شروع ہوگا۔