شان مسعود نے ڈربی شائر کاؤنٹی سے معاہدہ کرلیا

لندن (اردو پوائنٹ تازہ ترین اخبار ۔ 7 دسمبر 2021ء ) ٹیسٹ کرکٹر شان مسعود نے 2022ء کے پورے سیزن کے لیے ڈربی شائر کے ساتھ بطور اوورسیز کھلاڑی معاہدہ کر لیا ہے۔ پاکستان کے لیے 25 ٹیسٹ کھیلنے والے 32 سالہ شان مسعود نے تمام فارمیٹس میں 300 سے زائد میچز کھیلے ہیں اور 31 سنچریاں سکور کی ہیں۔ انہوں نے لسٹ اے کرکٹ میں 57.46 کی اوسط کے ساتھ 14 سنچریاں بھی سکور کررکھی ہیں ۔

(جاری ہے)

اوپننگ بلے باز کے پاس ٹی 20 کرکٹ کا کافی تجربہ ہے اور انہوں نے ملتان سلطانز کی کپتانی کرتے ہوئے 2019ء میں پاکستان سپر لیگ کے گروپ ٹیبل میں اسے ٹاپ پوزیشن دلائی تھی ۔ شان مسعود ہیڈ آف کرکٹ ڈربی شائر مکی آرتھر کے ساتھ کام کریں گے جن کی کوچنگ میں وہ قومی ٹیم کے لیے 2016ء سے 2019ء تک کھیلے تھے ، وہ اپریل میں کاؤنٹی چیمپئن شپ فکسچر سے شروع ہونے والے 2022ء سیزن کے دوران تمام فارمیٹس کے لیے ڈربی شائر کی ٹیم کو دستیاب ہوں گے۔