پی ایس ایل کوڈ آف کنڈکٹ کی خلاف ورزی ، بین کٹنگ اور سہیل تنویر پر 15،15 فیصد جرمانہ عائد

لاہور (اردو پوائنٹ تازہ ترین اخبار ۔ 16 فروری 2022ء ) پشاور زلمی کے بین کٹنگ اور کوئٹہ گلیڈی ایٹرز کے سہیل تنویر پر منگل کو پاکستان سپر لیگ 2022ء میں اپنی ٹیم کے میچ کے دوران الگ الگ واقعات میں پی ایس ایل ضابطہ اخلاق کی لیول 1 کی خلاف ورزی پر میچ فیس کا 15 فیصد جرمانہ عائد کیا گیا ہے۔ دونوں کھلاڑیوں نے پلیئرز اور پلیئر سپورٹ پرسنل کے لیے پی ایس ایل کوڈ آف کنڈکٹ کے آرٹیکل 2.6 کی خلاف ورزی کی ہے، جس کا تعلق پی ایس ایل میچ کے دوران ’ایسا اشارہ استعمال کرنے سے ہے جو فحش، جارحانہ یا توہین آمیز ہو‘۔

یہ واقعہ پشاور زلمی کی اننگز کے آخری اوور میں اس وقت پیش آیا جب بلے باز بین کٹنگ نے بالر سہیل تنویر کو لگاتار تیسرا چھکا مارنے کے بعد اپنی انگلیوں کا استعمال کرتے ہوئے نامناسب اشارے کئے۔

(جاری ہے)

سہیل تنویر نے آخری اوور کی پہلی گیند پر نسیم شاہ کے بال پر کٹنگ کا کیچ پکڑ کر انہیں دوبارہ ایسے ہی اشارے کیے تھے۔ کٹنگ اور سہیل دونوں نے جرم کا اعتراف کیا اور میچ ریفری علی نقوی کی طرف سے عائد کی جانے والی پابندیوں کو قبول کر لیا اور اس طرح رسمی سماعت کی ضرورت نہیں تھی۔

یہ الزامات آن فیلڈ امپائر مائیکل گف اور راشد ریاض، تھرڈ امپائر آصف یعقوب اور چوتھے امپائر ولید یعقوب نے لگائے۔ لیول 1 کی خلاف ورزیوں کے تمام پہلی بار کے جرائم میں کم از کم جرمانہ آفیشل وارننگ اور/یا قابل اطلاق میچ فیس کے 25 فیصد تک جرمانہ عائد کیا جاتا ہے۔