راشد خان مرحومہ والدہ کی یاد میں جذباتی ہوگئے

کابل (اردو پوائنٹ تازہ ترین اخبار ۔ 8 مئی 2022ء ) افغان ٹیسٹ کرکٹر راشد خان ’ماؤں کے عالمی دن‘ کے موقع پر اپنی مرحومہ والدہ کی یاد میں جذباتی ہوگئے۔ راشد خان نے ٹوئٹر پر اپنی تصویر شیئر کی جس میں وہ اپنی والدہ کی قبر پر فاتحہ پڑھ رہے ہیں۔ ٹوئٹر پر تصویر شیئر کرتے ہوئے راشد خان نے جذباتی انداز میں لکھا کہ ’’پیاری امّی! کیا آپ واپس آکر کچھ دیر ٹھہر سکتی ہیں؟، میں آپ کی آواز سننا چاہتا ہوں اور آپ کو مسکراتا دیکھنا چاہتا ہوں۔

(جاری ہے)

‘ راشد خان نے مزید لکھا کہ ’میں ہمیشہ آپ کے ساتھ رہنا چاہتا ہوں، آپ کو کبھی جانے نہیں دینا چاہتا ہوں اور آپ کو یہ بتانا چاہتا ہوں کہ میں آپ سے کتنا پیار کرتا ہوں۔‘ اُنہوں نے اپنے جذبات کا مزید اظہار کرتے ہوئے لکھا کہ ’آپ کو یاد رکھنا آسان ہے، میں یہ ہر روز کرتا ہوں لیکن آپ کی کمی دل کا درد ہے جو کبھی دور نہیں ہوتا ہے‘‘۔ واضح رہے کہ راشد خان کی والدہ 18 جون 2020ء کو طویل علالت کے بعد انتقال کر گئیں تھیں ۔