ترک باکسر موسیٰ یامک دوران فائٹ زندگی کی بازی ہار گئے

میونخ (اردو پوائنٹ تازہ ترین اخبار ۔ 19 مئی 2022ء ) جرمن باکسنگ چیمپئن کے دوران ترک باکسر موسیٰ یامک رنگ میں ہارٹ اٹیک کے باعث زندگی کی بازی ہار گئے۔ غیر ملکی خبر رساں ایجنسی کی رپورٹ کے مطابق جرمنی کے شہر میونخ میں 38 سالہ ترک باکسر موسیٰ یامک رنگ میں یوگنڈا کے حمزہ وینڈیرا سے باکسنگ کررہے تھے کہ میچ کے دوران انہیں اچانک دل کا دورہ پڑا جو جان لیوا ثابت ہوا۔

موسیٰ کو فوری طبی امداد کے لیے مقامی ہسپتال منتقل کیا گیا تاہم ڈاکٹرز نے ان کی موت کی تصدیق کی۔ ترک عہدیدار حسن توران نے ٹوئٹر پر کہا کہ ہم نے اپنے ہم وطن موسٰی اسکان یامک کو کھودیا ہے، انہوں نے حال ہی میں یورپی اور ایشیائی چیمپئن شپ جیتی تھی۔ موسیٰ کا تعلق ترکی کے شہر ایلورہ سے تھا۔ فائٹ کے تیسرے راؤنڈ میں میچ کے دوران وینڈیرا نے یامک پر مکے برسائے تھے، جس کے باعث وہ لڑکھڑا گئے تھے، میچ تمام ڈیجیٹل پلیٹ فارمز پر لائیو نشر کیا جارہا تھا۔

(جاری ہے)

ترک باکسر موسیٰ یامک مسلسل 8 میچوں سے ناقابلِ شکست تھے، انہوں نے پروفشنل باکسنگ کا آغاز 2017ء میں کیا تھا جب کہ 2021ء میں ورلڈ باکسنگ فیڈریشن انٹرنیشنل ٹائٹل جیتنے پر شہرت ملی تھی۔