محمد حسنین کا آفیشل بائولنگ ٹیسٹ لے لیا گیا

لاہور (اردو پوائنٹ تازہ ترین اخبار ۔ 23 مئی 2022ء ) قومی فاسٹ بولر محمد حسنین کا آفیشل بولنگ ٹیسٹ لے لیا گیا۔ پاکستان کے ابھرتے ہوئے سٹار فاسٹ بولر محمد حسنین کا بولنگ ٹیسٹ لاہور میں آئی سی سی سےمنظور شدہ بائیو مکینک لیب میں لیا گیا۔ ٹیسٹ کا نتیجہ دو ہفتوں میں آئی سی سی کو بھیجا جائے گا۔ ایکشن کلیئر ہونے کی صورت میں قومی پیسر انٹرنیشنل کرکٹ میں واپسی کے اہل ہوجائیں گے۔

حسنین کا بولنگ ایکشن رواں برس آسٹریلیا میں بگ بیش لیگ کے دوران رپورٹ ہوا تھا۔ ایکشن مشکوک قرار دیے جانے کے بعد ان پر پابندی لگا دی گئی تھی۔

(جاری ہے)

چند روز قبل پی سی بی کی جانب سے فاسٹ بولر محمد حسنین کا دوسرا بائیو مکینک ٹیسٹ کروایا تھا جس میں ان کے بازو کا خم 15 ڈگری کے اندر پایا گیا تھا۔ پاکستان کی طرف سے 8 ون ڈے انٹرنیشنل اور 18 ٹی 20 انٹرنیشنل میچوں میں مجموعی طور پر 29 وکٹیں حاصل کرنے والے محمد حسنین پاکستان سپرلیگ (پی ایس ایل) کےعلاوہ بگ بیش، کیریبین پریمیئر لیگ اور لنکن پریمئیر لیگ میں بھی حصہ لے چکے ہیں۔