عام آدمی کو سیاسی فیصلوں کی مشکلات کیوں بھگتنا پڑتی ہیں؟، محمد حفیظ کا شہباز شریف، عمران خان، مریم نواز سے سوال

لاہور (اردو پوائنٹ تازہ ترین اخبار ۔ 25 مئی 2022ء ) پاکستان کرکٹ ٹیم کے سابق کپتان محمد حفیظ نے ملک کی موجودہ سیاسی صورتحال کے باعث لاہور میں پیدا ہونے والی مشکلات سے متعلق وزیراعظم شہباز شریف سمیت دیگر سیاسی رہنماؤں سے سوال پوچھ لیا۔ تفصیلات کے مطابق تحریک انصاف کے حقیقی آزادی مارچ کے باعث حکومت نے صوبہ پنجاب کے تمام اضلاع کے داخلی اور خارجی راستے بند کردیے ہیں۔

راستوں کی بندش اور سیاسی صورتحال کے باعث ملک کے مختلف شہروں میں پیٹرول نہ ملنے کی شکایات سامنے آرہی ہے۔

(جاری ہے)

محمد حفیظ نے سماجی رابطے کی ویب سائٹ ٹوئٹر پر لکھا کہ ’لاہور کے کسی پیٹرول پمپ پر پیٹرول دستیاب نہیں اور اے ٹی ایم مشینوں پر پیسے بھی نہیں ہیں۔ محمد حفیظ نے اپنے پیغام میں وزیراعظم شہباز شریف، سابق وزیراعظم اور چیئرمین تحریک انصاف عمران خان، مریم نواز اور وزیر خارجہ بلاول بھٹو کو مخاطب کرتے ہوئے سوال کیا کہ عام آدمی کو سیاسی فیصلوں کی مشکلات کیوں بھگتنا پڑتی ہیں‘؟۔