کرکٹر عثمان قادر تیسری بیٹی کے باپ بن گئے

لاہور (اردو پوائنٹ تازہ ترین اخبار ۔ 28 مئی 2022ء ) مایہ ناز لیگ سپنر مرحوم عبدالقادر کے صاحبزادے اور قومی کرکٹر عثمان قادر کے ہاں تیسری بیٹی کی پیدائش ہوئی ہے۔ 28 سالہ عثمان قادر نے اپنی ننھی پری کی پیدائش کی اطلاع اپنے سوشل میڈیا پیغام کے ذریعے دی جس میں اُنہوں نے اپنی بیٹی کی جھلک بھی شیئر کی۔ تصویر میں دیکھا جاسکتا ہے کہ عثمان قادر نے اپنی ننھی پری کو گود میں لیا ہوا ہے اور محبت بھری نظروں سے بیٹی کو دیکھ رہے ہیں جبکہ بیٹی کا چہرہ ایموجی سے چھپایا ہوا ہے۔

اُنہوں نے اپنے ٹوئٹ میں لکھا کہ ’اللہ نے ہمیں اپنی تیسری رحمت سے نوازا ہے، الحمداللہ! اب میری ملکہ کے ساتھ 3 شہزادیاں ہیں‘۔ عثمان قادر نے اس خوشخبری کے ساتھ مداحوں سے دعاؤں کی درخواست بھی کی۔ ٹوئٹر صارفین کی جانب سے عثمان قادر اور اہلیہ کو مبارکباد دینے کا سلسلہ جاری ہے۔

(جاری ہے)

واضح رہے کہ عثمان قادر نے 2018ء میں اداکارہ صوبیہ خان سے شادی کی تھی ۔ اکتوبر 2019ء میں ان کے ہاں پہلی بیٹی پیدا ہوئی تھی جب کہ گزشتہ برس جنوری میں عثمان قادر کے ہاں دوسری بیٹی کی پیدائش ہوئی تھی۔