پاکستانی کوہ پیما اسد علی کا کارنامہ، شمالی امریکا کی بلند ترین چوٹی سر کرلی

لاہور (اردو پوائنٹ تازہ ترین اخبار ۔ 31 مئی 2022ء ) پاکستانی کوہ پیما اسد علی میمن نے شمالی امریکہ کی بلند ترین چوٹی کو سر کرلیا۔ شمالی امریکہ کے علاقے الاسکا میں موجود 6 ہزار 190 میٹر بلند دینالی کو اسد علی نے 28 مئی کو سر کیا ہے۔ کوہ پیما اسد علی میمن اس سے قبل ماؤنٹ کیلی مانجرو، اکونگوا اور البروس کو سر کرچکے ہیں۔ پاکستانی کوہ پیما اسد علی میمن 7 براعظموں کی 7 بلند ترین چوٹیوں کو سر کرنے کا ارادہ رکھتے ہیں۔

(جاری ہے)

قبل ازیں پاکستان کے دو کوہ پیماؤں نے دنیا کی پانچویں بلند ترین چوٹی ماؤنٹ مکالو کو سر کرنے کا اعزاز اپنے نام کرلیا۔ کوہ پیما سرباز علی خان نے نیپال میں واقع 8463 میٹر بلند چوٹی کو ہفتے کی صبح سر کیا، سرباز علی خان نے 8 ہزار میٹر سے بلند دنیا کی 14 میں سے گیارہویں چوٹی کو سر کیا۔ سِرباز کے کرئیر میں بلند ترین 14 چوٹیوں میں سے گیشربرم ون، شیش پنمگا اور چو ایو کو سر کرنا باقی رہ گیا ہے، سرباز خان گیارہ 8000 میٹر بلند چوٹیوں کو سر کرنے والے پہلے پاکستانی کوہ پیما بھی ہیں۔