کامن ویلتھ گیمز: ارشد ندیم 90 میٹر کی تھرو کرنیوالے پہلے جنوبی ایشیائی ایتھلیٹ بن گئے

لاہور (اردو پوائنٹ تازہ ترین اخبار ۔ 8 اگست 2022ء ) پاکستانی ایتھلیٹ ارشد ندیم 90 میٹر کی تھرو کرنے والے نہ صرف پاکستان بلکہ جنوبی ایشیا کے پہلے ایتھلیٹ بن گئے۔ کامن ویلتھ گیمز میں پاکستان کے ارشد ندیم نے جویلین تھرو میں گولڈ میڈل جیتا، انہوں نے پانچویں باری میں 90.18 میٹر کی ریکارڈ تھرو کی، یہ تھرو اس سال کی تیسری بہترین تھرو ہے۔ اس سال اینڈرسن پیٹرز 93.07 میٹر اور جیکب ویڈلیک 90.88 میٹر کی تھرو کر چکے ہے۔

(جاری ہے)

ارشد ندیم سب سے بڑی تھرو کرنے والے جنوبی ایشیا کے پہلے جب کہ دوسرے ایشین کھلاڑی بن گئے ہیں، تائیوان کے چاؤ سن چینگ نے 2017ء میں 91.36 میٹر کی تھرو کی تھی۔ واضح رہے کہ پاکستان کا سر فخر سے بلند کرنے والے ایتھلیٹ ارشد ندیم نے جویلین تھرو (نیزہ بازی) میں 90.18 میٹر کی ریکارڈ تھرو کر کے گولڈ میڈل اپنے نام کر لیا ہے۔ انہوں نے 1966ء کے بعد پہلی بار پاکستان کے لیے کامن ویلتھ گیمز ایتھلیٹکس میں گولڈ میڈل جیتا ہے۔