ندیم ارشد ایشین اور اولمپکس میں بھی گولڈ میڈل جیت سکتے ہیں،گوہر رضا

کراچی (اُردو پوائنٹ اخبارتازہ ترین - اے پی پی۔ 11 اگست2022ء) پاکستان سکول سپورٹس اولمپک ایسوسی ایشن کے صدر اور سابق نیشنل ایتھلیٹ سید گوہر رضا،سیکرٹری پی ایس ایس او اور سابق نیشنل ایتھلیٹ سید محمد ندیم ،سیکر ٹری پی ایس ایس اوکراچی محمد ریاض ،محمد رفیع ،محمد ناظم اور دیگر نے کامن ویلتھ گیمز کے جیولن تھرو ایونٹ میں نئے گیمز ریکارڈ کے ساتھ گولڈ میڈل جیتنے پر قومی ہیرو اور ایتھلیٹ ارشد ندیم کو مبارک باد دی ہے ۔

جمعرات کو جاری کردہ اپنے مشترکہ بیان میں ان کا کہنا تھا کہ ارشد ندیم حقیقی معنوں میں ہمارے قومی ہیرو ہیں جو سکول لائف سے ہی چیمپئن تھے اور اسی انداز سے آگے بڑھتے رہے ،ان کی مسلسل سخت محنت اوراپنے عزائم میں بلندی و پختگی نے ان کے لئے کامیابی کے دروازے کھولے۔

(جاری ہے)

انہوں نے اپنی کامیابیوں سے ثابت کیا کہ قدرت کسی کی محنت رایئگاں نہیں جانے دیتی۔

ندیم ارشد ،نوح دستگیر بٹ اور دیگر ایتھلیٹس نے جونیئر ایتھلیٹس کے لئے بھی مسلسل محنت کرنے اور کبھی بھی مایوس نہ ہونے کی مثال بھی قائم کی ہے ۔ہماری دعا ہے کہ ارشد ندیم ایشین اور اولمپکس مقابلوں میں بھی گولڈ میڈل جیت کر پاکستان کا نام دنیا بھر میں ایک بار پھر روشن کریں ۔ انہوں نے ویٹ لفٹنگ میں گولڈ میڈل جیتنے والے نوح دستگیر بٹ، ریسلنگ اور جوڈو میں میڈلز جیتنے والے تمام قومی ایتھلیٹس کو بھی کامیابی پر مبارک باد پیش کی ہے ۔