پہلے 15 ون ڈے میچز میں سب سے زیادہ وکٹیں، حارث رئوف نے سرفراز نواز کا 43 سالہ ریکارڈ توڑ دیا

لاہور (اردو پوائنٹ تازہ ترین اخبار ۔ 19 اگست 2022ء ) قومی ٹیم کے فاسٹ بائولر حارث رئوف نے پہلے 15 ون ڈے میچز میں سب سے زیادہ وکٹیں لینے کا سرفراز نواز کا 43 سالہ ریکارڈ توڑ دیا ۔ 28 سالہ حارث رئوف نے نیدرلینڈز کے خلاف دوسرے ون ڈے میں صرف 16 رنز کے عوض 3 وکٹیں حاصل کیں اور پاکستان کی 7 وکٹوں سے جیت میں اہم کردار ادا کیا ۔ حارث رئوف اب تک 15 ون ڈے میچز میں 25.37 کی اوسط سے 29 وکٹیں حاصل کرچکے ہیں ۔

(جاری ہے)

حارث رئوف سے قبل پہلے 15 میچز میں زیادہ وکٹیں لینے کا ریکارڈ سرفراز نواز کے پاس تھا جنہوں نے 1973ء سے 1979ء کے دوران اپنے پہلے 15 ون ڈے میچز میں 28 وکٹیں لی تھیں ۔ سابق لیگ سپنر عبدالقادر ، حسن علی اور عثمان خان شنواری نے بھی اپنے پہلے 15،15 ون ڈے میچز میں 28،28 شکار کیے تھے ۔ قومی ٹیم کے لیفٹ آرم پیسر شاہین شاہ آفریدی اور دنیا کے تیز ترین فاسٹ بائولر شعیب اختر نے اپنے پہلے 15،15 ون ڈے مقابلوں میں 26،26 وکٹیں حاصل کیں ۔