پی سی بی نے باضابطہ طور پر پی ایس ایل فرنچائزز کو آئی پی ایل طرز کا آکشن ماڈل تجویز کردیا

لاہور (اردو پوائنٹ تازہ ترین اخبار ۔ 19 اگست 2022ء ) پاکستان کرکٹ بورڈ (پی سی بی) نے پاکستان سپر لیگ (پی ایس ایل) کے تمام فرنچائز مالکان کو موجودہ ڈرافٹ ماڈل کی بجائے نیلامی کا ماڈل اپنانے کے حوالے سے تجویز بھیج دی ہے۔ پی سی بی کے مطابق نیلامی کا ماڈل پاکستان کے پریمیئر ٹی ٹونٹی ٹورنامنٹ میں مزید ستاروں کو راغب کرنے میں مدد دے گا کیونکہ انہیں ڈرافٹ ماڈل کے مقابلے میں زیادہ مراعات دی جائیں گی۔

اطلاعات کے مطابق پی سی بی آئی پی ایل طرز کے نیلامی کے ماڈل کو نافذ کرنے کی کوشش کر رہا ہے تاکہ پی ایس ایل کو تیز رفتاری سے آگے بڑھایا جا سکے۔ رپورٹس کے مطابق پی ایس ایل فرنچائز مالکان اس تجویز پر زیادہ پرجوش نہیں ہیں کیونکہ ان کا خیال ہے کہ ان پر مالی بوجھ مزید بڑھے گا جبکہ پی سی بی کو بنیادی فائدہ ہوگا۔

(جاری ہے)

فرنچائز مالکان نے تجویز میں کچھ تفصیلات پر بھی سوال اٹھایا۔

انہوں نے پی سی بی حکام سے سوال کیا کہ نئے ماڈل کو کامیاب بنانے کے لیے پہلے ہی کیا کیا جا چکا ہے اور کیا انہوں نے لیگ میں شرکت کے لیے دنیا بھر کے سرکردہ کھلاڑیوں سے رابطہ کیا ہے۔ فرنچائز مالکان نے پی سی بی کے چیئرمین رمیز راجہ سے ملاقات کی درخواست کی ہے جس میں نیلامی کے ماڈل کی پیچیدہ تفصیلات پر تبادلہ خیال کیا جائے گا۔ یہ ملاقات رمیز راجہ کی برطانیہ سے وطن واپسی پر ہونے والی ہے۔ اگر دونوں فریق اس معاملے پر کسی معاہدے پر پہنچ جاتے ہیں تو پی ایس ایل 2024ء کے بعد نیلامی کا ماڈل اپنانے کا امکان ہے۔