مراکش کے گول کیپر نے مخالف ٹیموں کیلئےگول کرنا بے انتہاء مشکل بنا دیا

دوحہ (اُردو پوائنٹ، اخبار تازہ ترین، 6دسمبر 2022) مراکش کے گول کیپر نے مخالف ٹیموں کیلئےگول کرنا بے انتہاء مشکل بنا دیا۔ تفصیلات کے مطابق فیفا ورلڈکپ کے پری کوارٹر فائنل میں مراکش کی فتح میں کلیدی کردار ادا کرنے والے یاسین بونو کو ہیرو قرار دیا جا رہا ہے۔ یاسین بونو نے پری کوارٹر فائنل میں اسپین کیلئے ناصرف 90 منٹس اور اضافی وقت میں گول کرنا ناممکن بنائے رکھا، بلکہ پنالٹی ککس پر بھی اسپین کے کھلاڑیوں کے آگے دیوار بنے

 رہے۔

 بتایا گیا ہےکہ یاسین بونو کی شاندار گول کیپنگ کی وجہ سے ہی مراکش کیخلاف ورلڈکپ میں اب تک صرف 1 گول اسکور ہوا ہے۔ واضح رہے کہ فٹبال ورلڈکپ کی تاریخ میں پہلی مرتبہ کوئی عرب ملک کوارٹر فائنل میں پہنچ گیا، قطر میں جاری ورلڈکپ کے دوران مراکش کی فٹبال ٹیم نے سابق عالمی چیمپئن اسپین کو شکست دے کر شاندار اعزاز اپنے نام کر لیا۔

(جاری ہے)

قطر میں جاری فیفا ورلڈکپ کے پری کوارٹر فائنل مرحلے کے سلسلے میں سابق عالمی چیمپئن اسپین اور مراکش کے درمیان کھیلے گئے پری کوارٹر فائنل میچ کے 90 منٹس کا کھیل بنا کسی گول کے برابر رہا، بعد ازاں اضافی وقت میں بھی کوئی ٹیم گول نہ کر سکی، جس کے باعث پنالٹی ککس پر میچ کا فیصلہ کیا گیا۔

پنالٹی ککس مرحلے میں مراکش نے 0 کے مقابلے میں 3 گول سے فتح حاصل کر لی۔ سابق عالمی اور یورو چیمپئن اسپین کے کھلاڑی 3 پنالٹی ککس میں سے کسی ایک پر بھی گول نہیں کر پائے، مراکش کے گول کیپر نے شاندار کھیل کا مظاہرہ کرتے ہوئے فٹبال کی دنیا کی ہیوی ویٹ اسپین کی تمام 3 پنالٹی ککس کو روکا، جبکہ مراکش کے کھلاڑی 4 میں سے 3 ککس پر گول کرنے میں کامیاب رہے۔

یوں مراکش رواں ورلڈکپ کے کوارٹر فائنل میں پہنچنے والا واحد اسلامی ملک بن گیا۔ تاریخی فتح کے بعد مراکش کے کھلاڑی میدان میں ہی سجدہ ریز ہو گئے، جبکہ اسٹیڈیم میں موجودہ مراکش کے تماشائی اپنے جذبات پر قابو نہ رکھ سکے۔ واضح رہے کہ مراکش 12 سال بعد فیفا ورلڈکپ کے کوارٹر فائنل مرحلے میں پہنچنے والی پہلی افریقی ٹیم ہے۔ آخری مرتبہ 2010 کے ورلڈکپ میں گھانا کی ٹیم کوارٹر فائنل میں پہنچنے میں کامیاب ہوئی تھی۔