ملک میں فٹ بال اور فٹ سال کی ترقی کیلئے اپنا کردار ادا کرتا رہوں گا، رائوآصف اقبال فریدی

اسلام آباد (اُردو پوائنٹ اخبارتازہ ترین - اے پی پی۔ 03 فروری2023ء) فٹ بال کے مایہ ناز کوچ رائو آصف اقبال فریدی نے کہا ہے کہ ملک میں فٹ بال اور فٹ سال کی ترقی کے لیے اپنا کردار ادا کرتا رہوں گا۔ ان خیالات کا اظہار انہوں نے گزشتہ روز میڈیا سے گفتگو کرتے ہوئے کیا۔ انہوں نے کہا کہ ملک میں کھیلوں کے ٹیلنٹ کی کمی نہیں بلکہ کھلاڑیوں کو سہولیات فراہم کرنے کی ضرورت ہے۔

(جاری ہے)

انہوں نے کہا کہ ہمارے کھلاڑیوں نے کھیل کے میدانوں میں دنیا پر حکمرانی کر رکھی تھی، ان کھیلوں میں سکواش، کرکٹ، ہاکی، سنوکر ،کبڈی اور دیگر کھیلیں شامل تھیں لیکن آہستہ آہستہ یہ اعزازات ہمارے ہاتھ سے نکلتے گئے، اس کی سب سے بڑی وجہ یہ تھی کہ کھلاڑیوں نے محنت کرنا چھوڑ دی۔خواتین کھلاڑیوں کے حوالے سے ایک سوال کے جواب میں رائو آصف اقبال فریدی نے کہا کہ ہماری خواتین کھلاڑیوں میں کھیلوں کا بے پناہ ٹیلنٹ موجود ہے لیکن ان کھلاڑیوں کو بین الاقوامی سطح کی تربیت اور سہولیات فراہم کرنے کی ضرورت ہے۔ انہوں نے کہا کہ ہمارے ہاں کھیلوں کا کوئی خاص بنیادی ڈھانچہ تیار کرنے کی ضرورت ہے۔