محکمہ کھیل بلوچستان کھیل اورکھلاڑیوں کی ترقی اور فروغ کے لیے شب و روز مصروف عمل ہے،محکمہ کھیل بلوچستان

کوئٹہ (اُردو پوائنٹ اخبارتازہ ترین - اے پی پی۔ 22 ستمبر2023ء) محکمہ کھیل بلوچستان کھیل اور کھلاڑیوں کی ترقی اور فروغ کے لیے شب و روز مصروف عمل ہے۔ ترجمان محکمہ کھیل بلوچستان کے مطابق وزیر برائے کھیل و ثقافت نوابزادہ جمال رئیسانی نے سپیشل اولمپکس ورلڈ سمرگیمز2023 جو کہ 12 جون سے 27 جون تک جرمنی کے شہر برلن میں منعقد ہوئے میں بلوچستان سے تعلق رکھنے والے کھلاڑیوں میر وائس خان اور محمد سفیان کو نقد انعامات سے نوازا۔

(جاری ہے)

سپیشل اولمپکس ورلڈ سمر گیمز جرمنی میں میر وائس نے ایتھلیٹکس میں 3 ہزار میٹر دوڑ میں دوسری پوزیشن حاصل کرتے ہوئے پاکستان کے لیے چاندی کا تمغہ حاصل کیا تھاجبکہ محمد سفیان نے فٹ سال کے ایونٹ میں بہترین کھیل پیش کیا اور پاکستان فٹ سال ٹیم نے کھیلوں کے ان مقابلوں میں دوسری پوزیشن حاصل کی اور سلور میڈل حاصل کیا۔ وزیر برائے کھیل و ثقافت نوابزادہ جمال رئیسانی نے دونوں کھلاڑیوں کی حوصلہ افزائی کرتے ہوئے ان سے ملاقات کی اور ان کی اس کاوش کو سراہتے ہوئے انہیں نقد انعامات سے نوازا۔ اس موقع پر ڈائریکٹر جنرل کھیل درا بلوچ اور بلوچستان سپیشل اولمپکس کی ریجنل مینجر اور کارڈینیٹر سپیشل اولمپکس پاکستان فائزہ شبیر بھی موجود تھیں۔