بنگلا دیش سے ذلت آمیز شکست، پاکستانی ٹیم نے ہوم گرائونڈ پر گزشتہ 55 سال کا بدترین ریکارڈ بنا ڈالا

لاہور (اردو پوائنٹ تازہ ترین اخبار۔ 4 ستمبر 2024ء ) پاکستان نے بنگلا دیش کیخلاف ہوم گراؤنڈ پر مسلسل 10 ٹیسٹ میچز میں ایک بھی فتح نہ سمیٹ کر ایک اور ناپسندیدہ ریکارڈ بھی بنا ڈالا۔ راولپنڈی میں کھیلے گئے 2 ٹیسٹ میچز کی سیریز کے پہلے میچ میں پاکستان کو 10 وکٹوں جبکہ دوسرے میں 6 وکٹوں کی شکست کا منہ دیکھنا پڑا۔ بنگلا دیش نے ٹیسٹ کرکٹ کی تاریخ میں پہلی بار پاکستان مسلسل ابتدائی 2 میچز میں شکست دی جبکہ پہلی بار پاکستان بنگلا دیش سے کوئی ٹیسٹ میچ ہارا۔

(جاری ہے)

اسی طرح یہ بھی پہلی بار ہے کہ پاکستان لگاتار ہوم گراؤنڈ پر 10 ٹیسٹ میچز میں کوئی ایک بھی فتح نہ سمیٹ سکا ہو۔ پاکستانی ٹیم 2022ء سے ہوم گراؤنڈ پر بھی ٹیسٹ سیریز تو دور میچ بھی جیتنے میں کامیاب نہ ہوسکی۔ 2022ء میں آسٹریلیا نے پاکستان کو 3 ٹیسٹ میچز کی سیریز میں 0-1 سے شکست دی، بعد ازاں انگلینڈ نے پاکستان کو ہوم گراؤنڈ پر 0-3 سے کلین سویپ شکست دیکر تاریخ رقم کی۔ 2022ء میں ہی پاکستان نے نیوزی لینڈ کی سی ٹیم کیساتھ 2 ٹیسٹ میچز کی سیریز 0-0 سے ڈرا کی اور فتح کو ترستی رہی۔ واضح رہے کہ قومی ٹیم 1962ء سے 1969ء کے دوران ہوم گراؤنڈ پر 9 ٹیسٹ میچز میں فتح سے محروم رہی تھی۔