ایچ ای سی کے کھلاڑیوں نے قومی اور بین الاقوامی چیمپئن شپس 24-2023میں 233 تمغے جیتے

اسلام آباد (اُردو پوائنٹ اخبارتازہ ترین - اے پی پی۔ 04 ستمبر2024ء) ہائیر ایجوکیشن کمیشن (ایچ ای سی)کے کھلاڑیوں نے قومی اور بین الاقوامی چیمپئن شپس 24۔2023 ء میں 233 تمغے جیتے۔ ایچ ای سی سے جاری پریس ریلیز کے مطابق یونیورسٹی کے کھلاڑیوں نے قومی و بین الاقوامی چیمپئن شپس میں 32 طلائی، 56 چاندی اور 145 کانسی کے تمغے جیتے۔ جامعات میں زیر تعلیم ایچ ای سی کی خواتین کھلاڑیوں نے قومی چیمپئن شپ میں 17 طلائی، 25 چاندی اور 21 کانسی کے تمغے جیت کر شاندار کارکردگی کا مظاہرہ کیا جبکہ خواتین کھلاڑیوں نے بین الاقوامی چیمپئن شپ میں 2 چاندی کے اور تین کانسی کے تمغے بھی حاصل کئے۔

ایچ ای سی کے ان نوجوان کھلاڑیوں نے 34ویں نیشنل گیمز میں پیشہ وارانہ کھلاڑیوں کا مقابلہ کیا اور 8 طلائی ، 17 چاندی اور 93 کانسی کے تمغے حاصل کرکے بہترین ٹرن آؤٹ ٹرافی کا ٹائٹل اپنے نام کیا۔

(جاری ہے)

ایچ ای سی تعلیمی برادری کھیلوں کے سٹیک ہولڈرز کی مشاورت سے جامعات کے طلباء کو بے مثال مواقع فراہم کرنے کے لئے چیئرمین ایچ ای سی اور یونیورسٹیوں کے وائس چانسلرز کی بھرپور سرپرستی میں مسلسل کام کر رہا ہے۔

پاکستان یونیورسٹی سپورٹس بورڈ کے آئین اور رولز میں بھی ترمیم کی گئی ہے جس کے تحت ایچ ای سی نے انعامی رقوم میں بھی نظر ثانی کی ہے۔ مزید برآں وزیراعظم یوتھ پروگرام کے تحت ایچ ای سی ملک بھر کی نجی یونیورسٹیوں میں 12 سپورٹس اکیڈمیاں قائم کر رہا ہے تاکہ کھیلوں کا انفراسٹرکچر قائم کیا جا سکے جو کھلاڑیوں کی ترقی اور پیشہ ور کھلاڑیوں میں تبدیلی کے لئے 24گھنٹے استعمال ہو سکیں۔ اس کے علاوہ 15 سے 25 سال کی عمر کے نوجوانوں میں کھیلوں کی مہارت، ہم آہنگی اور ٹیم ورک کا جذبہ پیدا کرنے کے لئے مختلف کھیلوں میں ملک گیر ٹیلنٹ ہنٹ مہم کو بھی کامیابی کے ساتھ انجام دیا جا رہا ہے۔پاکستانی کھیلوں کے بہتر مستقبل کے لئے ایچ ای سی اپنا متحرک کردار ادا کرنے کے لئے پرعزم ہے۔