فیصل آباد (اُردو پوائنٹ اخبارتازہ ترین - اے پی پی۔ 11 ستمبر2024ء) چیمپئنز ون ڈے کپ (کل)جمعرات 12 ستمبر سے
فیصل آباد میں شروع ہوگا، افتتاحی میچ یو ایم ٹی مارخورز اور پینتھرز کے درمیان اقبال اسٹیڈیم میں کھیلا جائے گا۔ شائقین کو چیمپئنز ون ڈے کپ میں سٹارز کرکٹرز کے ذریعے ایک روزہ
کرکٹ کے بہترین نظارے دیکھنے کو ملیں گے۔چیمپئنز ون ڈے کا افتتاحی میچ یوایم ٹی مارخورز (سابقہ وولوز) اور پینتھرز کے درمیان سہ پہر تین بجے کھیلا جائے گا۔
محمد رضوان یو ایم ٹی مارخورز کی کپتانی اورمصباح الحق ان کے مینٹور کے طور پر کام کریں گے جبکہ پینتھرز کی قیادت شاداب خان کریں گے اور ثقلین مشتاق ان کے مینٹور ہوں گے۔ سیزن کے اس افتتاحی ایونٹ کی کل انعامی رقم4کروڑ 90 لاکھ روپے ہے جس میں 29 ستمبر کو ٹورنامنٹ کے فاتح کو3 کروڑ روپے اور رنر اپ کو ڈیڑھ کروڑ روپے ملیں گے۔
(جاری ہے)
جمعہ کو محمد حارث کی الائیڈ بینک سٹالینز کا مقابلہ شاہین شاہ آفریدی کی نورپور لائنز سے ہوگاجس کے بعد ہفتہ کو سعود شکیل کی ڈولفنز اور شاداب خان کی پینتھرز کے درمیان مقابلہ ہوگا۔
پانچوں ٹیمیں گزشتہ پانچ دنوں سے
فیصل آباد میں ہیں اور ٹورنامنٹ کی تیاری کیلئے سخت تربیتی سیشنز میں حصہ لے رہی ہیں جس میں ملک کے بہترین کرکٹرز شامل ہیں۔ ٹورنامنٹ کی منصوبہ بندی آئندہ سال ہونے والی
آئی سی سی چیمپیئنز ٹرافی 2025 پر نظر رکھتے ہوئے کی گئی ہے جس میں قابل ذکر پرفارمرز قومی ٹیم میں شامل ہونے کے اپنے امکانات کو مضبوط بنانے کی کوشش کرینگے۔
قومی ٹیم
آسٹریلیا، زمبابوے، جنوبی
افریقہ میں ون ڈے میچوں میں حصہ لے گی اور ہوم سہ فریقی سیریز میں
نیوزی لینڈ اور جنوبی
افریقہ کے مقابل ہوگی۔وائٹ بال کے ہیڈ کوچ گیری کرسٹن50 اوورز کے ٹورنامنٹ کا مشاہدہ کرنے کیلئے
فیصل آباد میں ہوں گے ۔ ٹورنامنٹ سنگل راؤنڈ کی بنیاد پر کھیلا جائے گا۔ ٹورنامنٹ کے دوران ریڈ بال کے ہیڈ کوچ جیسن گلیسپی بھی
فیصل آباد میں گیری کرسٹن کو جوائن کریں گے۔
اس ٹورنامنٹ میں ٹاپ فور سائیڈز پلے آف میں جائیں گی جس کا اختتام 29 ستمبر کو فائنل میں ہوگا۔ ون ڈے کپ کی قومی سپورٹس چینلز پر لائیو کوریج ہوگی جبکہ تماشا، ٹیپ میڈ اور مائیکو ایپ پر لائیو سٹریمنگ اور شمالی
امریکہ میں ویلو ٹی وی پر نشر ہوگی۔ یو ایم ٹی مارخورز کے کپتان محمد رضوان نے کہا کہ چیمپیئنز ون ڈے کپ جیسا اعلیٰ معیار کا ڈومیسٹک ایونٹ کسی بھی
کرکٹ کھیلنے والے اہم ملک کی جان ہے کیونکہ یہ تجربہ
کار اور ابھرتے ہوئے دونوں کرکٹرز کو قومی سلیکشن کیلئے اپنے دعوے کو مضبوط کرنے کیلئے یکساں اور منصفانہ مواقع فراہم کرتا ہے۔
اس کو ذہن میں رکھتے ہوئے انہیں یقین ہے کہ یہ اپنے تمام مقاصد کو پورا کرے گا۔ فارمیٹ کے مطابق تمام ٹیموں کے ٹیلنٹ اور توازن کو دیکھتے ہوئے یہ ایک سخت مقابلہ ہوگا، جو ٹیم اگلے 15دنوں میں مسلسل اچھی کارکردگی دکھائے گی وہ فاتح بن کر سامنے آئے گی۔ خواہش ہے کہ میری ٹیم اس ٹورنامنٹ سے لطف اندوز ہو، حریفوں سے نہ گھبرائے اور
فیصل آباد کے لوگوں کو محظوظ کرنے کیلئے اپنی صلاحیتوں کا مظاہرہ کرے۔
پینتھرز کے کپتان شاداب خان نے کہا کہ ہم نے
فیصل آباد میں سخت ٹریننگ کی ہے اور اب وقت آگیا ہے کہ اس کوشش کو مثبت نتائج میں تبدیل کیا جائے۔ جب بھی ہم میدان میں قدم رکھتے ہیں تو ہمیں شدت اور جذبہ لانے کی ضرورت ہے کیونکہ یہ ٹورنامنٹ جیتنا آسان نہیں ہوگا، صرف وہی ٹیم جو مستقل مزاجی کا مظاہرہ کرے گی سب سے اوپر آئے گی اور مجھے اپنی ٹیم پر مکمل اعتماد ہے۔
سیزن کا آغاز ایک ہائی پریشر ٹورنامنٹ کے ساتھ کرنا، چیمپیئنز ون ڈے کپ جیسا ٹورنامنٹ باقی سیزن کے لیے سمت متعین کرے گا ، مجھے کوئی شک نہیں کہ ہم مزید چیمپئن کرکٹرز کو تلاش کریں گے جو نہ صرف قومی ٹیم میں شامل ہوں گے بلکہ
پاکستان کو بین الاقوامی
کرکٹ میں خود کو ایک قوت کے طور پر دوبارہ قائم کرنے میں بھی مدد کریں گے۔شاداب خان نے کہا کہ محمد رضوان، شاہین شاہ آفریدی، سعود شکیل اور محمد حارث قومی ٹیم میں میرے ساتھی ہیں لیکن جب ہم میدان میں اترتے ہیں تو کوئی دوست نہیں ہوتا اور ہم سخت محنت سے جیتنے کیلئے کھیلتے ہیں۔
ایونٹ میں حصہ لینے والے16 کھلاڑیوں کے سکواڈزمیں ڈولفنزکے سعود شکیل (کپتان)، آصف علی، فہیم اشرف، میر حمزہ، محمد عباس آفریدی، محمد ہریرہ، محمد اخلاق، محمد
ریاض اللہ، نعمان علی، قاسم اکرم، صاحبزادہ فرحان، ثمین گل، سرفراز احمد، سفیان مقیم، عمر امین اور عثمان قادرجبکہ مینٹور سرفراز احمدہیں۔لائنز کے شاہین شاہ آفریدی (کپتان)، عامر یامین، عامر جمال، عبداللہ شفیق، احمد دانیال، فیصل اکرم،
امام الحق، خوشدل شاہ، محمد اصغر، محمد طحہٰ، محمد عرفان خان، عمیر بن یوسف، روحیل نذیر، سجاد علی ہاشمی، شرون سراج اور سراج الدین جبکہ مینٹور
وقار یونس۔ مارخورزکے محمد رضوان (کپتان)، عبدالصمد، عاکف جاوید، علی عثمان، بسم اللہ خان، فخر زمان، حسیب اللہ، افتخار احمد، کامران غلام، محمد فیضان، محمد عمران جونیئر، محمد نواز، محمد سرور آفریدی، محمد عمران، نسیم شاہ، سلمان علی آغا، شاہنواز دھانی اور زاہد محمودجبکہ مینٹور
مصباح الحق ہیں۔علاوہ ازیں پینتھرزکے شاداب خان (کپتان)،عبدالواحد بنگلزئی، احمد بشیر، عماد بٹ، عرفات منہاس، اذان اویس، حیدر علی، محمد حسنین، محمد عمر، محمد ذیشان، مبصر خان، رضوان محمود، صائم ایوب، عمر صدیق، اسامہ میر اور عثمان خان جبکہ مینٹور ثقلین مشتاق ہوں گے۔
اسٹالینزکے محمد حارث (کپتان)، ابرار احمد، عادل امین، بابر اعظم، حارث رؤف، حسین طلعت، جہانداد خان، مہران ممتاز، محمد علی، محمد عامر خان، سعد خان، شان مسعود، طیب طاہر، عبید شاہ، یاسر خان اور زمان خان جبکہ مینٹور
شعیب ملک ہیں۔
