بحریہ ٹاؤن چیمپئنز ون ڈے کپ ، یو ایم ٹی مارخورز نے لیک سٹی پینتھرز کو 160 رنز سے شکست دیدی

فیصل آباد (اُردو پوائنٹ اخبارتازہ ترین - اے پی پی۔ 12 ستمبر2024ء) بحریہ ٹاؤن چیمپئنز ون ڈے کپ کے افتتاحی میچ میں یو ایم ٹی مارخورز نے لیک سٹی پینتھرز کو 160 رنز سے شکست دیدی، کامران غلام نے شاندار سنچری ، عبدالصمد اور افتخار احمد نے نصف سنچریاں سکور کیں، نسیم شاہ اور عاکف جاوید نے تین تین وکٹیں حاصل کرکے اپنی ٹیم کی فتح میں اہم کردار ادا کیا۔

اقبال سٹیڈیم فیصل آباد میں کھیلے گئے اس میچ میں لیک سٹی پینتھرز کے کپتان شاداب خان نے ٹاس جیت کر محمد رضوان کی یو ایم ٹی مارخورز کو پہلے بیٹنگ کی دعوت دی ، مارخورز نے مقررہ 50 اوورز میں 6 وکٹوں کے نقصان پر 347 رنز بنائے۔پینتھرز کی ٹیم جواب میں34.5 اوورز میں 187 رنز بناکر آؤٹ ہوگئی۔مارخورز کی اننگز کی خاص بات کامران غلام کی سنچری تھی انہوں نے 102گیندوں کا سامنا کرتے ہوئے12 چوکوں اور 3 چھکوں کی مدد سے 115 رنز سکور کیے۔

(جاری ہے)

یہ لسٹ اے ون ڈے میں ان کی ساتویں سنچری ہے۔فخر زمان کے 17 اور محمد فیضان کے 34 رنز پر آؤٹ ہونے کے بعد کامران غلام نے کپتان محمد رضوان کے ساتھ تیسری وکٹ کی شراکت میں 133 رنز کا اضافہ کیا۔ رضوان تین چھکوں کی مدد سے 45 رنز بناکر آؤٹ ہوئے۔کامران غلام اور افتخار احمد کے درمیان پانچویں وکٹ کی شراکت میں 62 رنز بنے۔ افتخار احمد نے7 چوکوں اور ایک چھکے کی مدد سے 57 رنز ناٹ آؤٹ اسکور کیےاور عبدالصمد کے ساتھ چھٹی وکٹ کی شراکت میں 87 رنز کا اضافہ کیا۔

عبدالصمد نے جارحانہ انداز میں بیٹنگ کرتے ہوئے صرف 25 گیندوں پر 62 رنز بنائے جس میں6 چھکے اور4 چوکے شامل تھے۔ پینتھرز کی طرف سے مبصرخان اور محمد حسنین دو دو وکٹیں حاصل کرنے میں کامیاب ہوسکے۔پینتھرز نے 348 رنز کے ہدف کے تعاقب میں اننگز شروع کی تو عاکف جاوید اور نسیم شاہ کی بولنگ نے اسے کسی بھی موقع پر سنبھلنے کا موقع نہیں دیا۔ عبدالواحد بنگلزئی 4 صائم ایوب 20، اذان اویس ایک عثمان خان 8، حیدرعلی 2 اور کپتان شاداب خان 4 رنز بناکر آؤٹ ہوئے۔

دسویں اوور کے اختتام پر پینتھرز کی 6 وکٹیں صرف52 رنز پر گرچکی تھیں۔عماد بٹ نے9 چوکوں اور 3 چھکوں کی مدد سے72 رنز سکور کیے۔ انہوں نے مبصرخان ( 33 رنز ) کے ساتھ 59 رنز کا اضافہ کیا جبکہ اسامہ میر( 21 رنز ) کے ساتھ بھی59 رنز کی شراکت قائم کی تاہم ان کی کوشش ناکافی ثابت ہوئی۔نسیم شاہ نے 27 رنز دے کر3 وکٹیں حاصل کیں۔ عاکف جاوید نے 43 رنز دے کر 3 کھلاڑی آؤٹ کیے۔ٹورنامنٹ کا دوسرا میچ جمعہ کو محمد حارث کی الائیڈ بینک سٹالینز اور شاہین آفریدی کی نورپور لائنز کے درمیان کھیلا جائے گا۔ ٹورنامنٹ کا افتتاحی میچ دیکھنے کے لئے بڑی تعداد میں شائقین اقبال سٹیڈیم میں موجود تھے۔