بحریہ ٹاؤن چیمپئنز ون ڈے کپ، فرسٹ کلاس اور جنرل انکلوژرز کے ٹکٹوں کی فروخت شروع

فیصل آباد (اُردو پوائنٹ اخبارتازہ ترین - اے پی پی۔ 18 ستمبر2024ء) بحریہ ٹاؤن چیمپئنز ون ڈے کپ، 20 ستمبر سے 29 ستمبر فائنل میچ کے فرسٹ کلاس اور جنرل انکلوژرز کے ٹکٹوں کی فروخت شروع ہو گئی۔میچوں کے تمام انکلوژرز کے ٹکٹ بدھ سے PCB.tcs.com.pk پر آن لائن دستیاب ہیں، فزیکل ٹکٹ بھی آج سے فیصل آباد کے مختلف ٹی سی ایس آؤٹ لیٹس پر دستیاب ہونگے۔فیصل آباد کے اقبال سٹیڈیم میں جاری بحریہ ٹاؤن چیمپئنز ون ڈے کپ کے فرسٹ کلاس اور جنرل انکلوژرز کے ٹکٹوں کی فروخت شروع کردی گئی۔

آن لائن ٹکٹ pcb.tcs.com.pk پر دستیاب ہیں جبکہ فزیکل ٹکٹ اسٹیڈیم کے قریب نامزد ٹی سی ایس آؤٹ لیٹس اور باکس آفس پر خریدے جا سکتے ہیں۔اس سے قبل پی سی بی نے ان شائقین کے لیے اسٹیڈیم میں مفت داخلے کا اعلان کیا تھا جو فرسٹ کلاس (حنیف محمد، تسلیم عارف، اعجاز احمد جونیئر، مصباح الحق) اور جنرل انکلوژرز (شاہد نذیر، وقار یونس وسیم اکرم اور ظہیرعباس) میں 12 سے 22 ستمبر تک میچز دیکھنا چاہتے تھے۔

(جاری ہے)

فیملیز کی حوصلہ افزائی کے لیے جمعہ 20 ستمبر سے اتوار 22 ستمبر تک ہونے والے ویک اینڈ میچوں سے لطف اندوز ہونے کے لیے جنرل انکلوژرز کے ٹکٹ 100 روپے میں دستیاب ہیں جبکہ شائقین فرسٹ کلاس انکلوژرز کے ٹکٹ 150 روپے سے خرید سکتے ہیں۔ وی آئی پی انکلوژرز (فضل محمود اور جاوید میانداد) کے ٹکٹ شائقین کے لیے 22 ستمبر تک میچز کے لیے 200 روپے میں دستیاب رہیں گے۔

22 ستمبر تک ہونے والے میچوں کے لیے گیلری کی نشستیں 1600 روپے میں دستیاب ہوں گی۔ 24، 25 اور 27 ستمبر کو ہونے والے پلے آف کے لیے جنرل اور فرسٹ کلاس انکلوژرز کے ٹکٹ بالترتیب 200 روپے اور 300 روپے میں دستیاب ہوں گے۔ فائنل میچ کے لیے شائقین جنرل انکلوژر کے ٹکٹ 300 روپے اور فرسٹ کلاس میں 400 روپے کے خرید سکتے ہیں۔تین پلے آف میچوں کے لیے وی آئی پی انکلوژر ٹکٹ شائقین کے لیے 500 روپے میں دستیاب ہوں گے۔ 29 ستمبر کو فائنل کے لیے وی آئی پی ٹکٹ 600 روپے میں دستیاب ہوں گے۔پلے آف کے لیے ہاسپٹلیٹی گیلری پاسز 2000 روپے میں دستیاب ہوں گے جبکہ فائنل کیلئے قیمت 2500 روپے ہوگی۔