بابر اعظم اور ویرات کوہلی کا موازنہ بے معنی ہے : ظہیر عباس

لاہور (اردو پوائنٹ تازہ ترین اخبار ۔ یکم اکتوبر 2024ء ) قومی ٹیم کے لیجنڈری اور سابق ٹیسٹ کرکٹر ظہیر عباس نے بابر اعظم کو ٹیم سے باہر نکالنے کا مطالبہ کردیا۔ ایک انٹرنیشنل کرکٹ ٹاک شو کی 100 ویں قسط کے دوران گفتگو کرتے ہوئے 77 سالہ ظہیر عباس نے بابر اعظم کی کارکردگی پر بات کی اور کہا ’بابر اعظم کو ٹیم سے ڈراپ کردینا چاہیے‘۔ ایشین بریڈمین کہلائے جانے والے سابق ٹیسٹ کرکٹر ظہیر عباس نے کہا کہ ’اگر بابر رنز نہیں بنا پا رہے کیوں کہ وہ ہمارے اہم بیٹسمین ہیں، اگر وہ آؤٹ آف فارم ہیں انہیں ٹیم سے بھی باہر نکال دینا چاہیے‘۔

دوسری جانب سابق ٹیسٹ کرکٹر ظہیر عباس نے بابر کی حالیہ پرفارمنس دیکھ کر ان کا بھارتی کرکٹر ویرات سے موازنہ بے بنیاد قرار دیا۔ظہیر عباس کا کہنا تھا کہ ’ویرات اور بابر کا موازنہ بے معنی ہے، ویرات ہر میچ میں رنز کرتے ہیں جب کہ بابر ہر میچ میں رنز نہیں کرتے تو آپ دونوں کا موازنہ کیسے کرسکتے ہیں‘؟ ۔

(جاری ہے)

واضح رہے کہ ظہیر عباس کے بابر سے متعلق ریمارکس ان کے حال ہی میں بنگلا دیش کے خلاف دی گئی خراب کارکردگی پر سامنے آئے ہیں، بابر نے بنگلادیش کے خلاف اپنی4 اننگز میں صفر، 22، 11 اور 31رنز بنائے تھے، اس سیریز میں پاکستان کو بنگلا دیش کے خلاف وائٹ واش سے شکست کا سامنا کرنا پڑا تھا۔

خراب کارکردگی کے باعث بابر اعظم کئی سالوں میں پہلی دفعہ ٹاپ 10 بیٹرز کی رینکنگ سے بھی باہر ہوئے ہیں۔