بھارت نے ٹیسٹ کرکٹ کی 147 سالہ تاریخ میں تیز ترین بیٹنگ کا نیا ریکارڈ بنا ڈالا

کانپور (اردو پوائنٹ تازہ ترین اخبار ۔ یکم اکتوبر 2024ء ) بھارت نے بنگلہ دیش کو دوسرے ٹیسٹ میچ میں بھی شکست دیکر سیریز دو صفر سے جیت لی۔ کانپور میں کھیلے میچ کے آخری روز بنگلہ دیش کی پوری ٹیم 146 رنز پر ڈھیر ہو گئی ، بھارت نے 95 رنز کا ہدف تین وکٹوں کے نقصان پر پورا کر لیا۔ پہلی اننگ میں بنگلہ دیش نے 233 رنز بنائے تھے جس کے جواب میں بھارت نے 9 وکٹوں کے نقصان پر 285 رنز بنا کر اننگ ڈکلیئر کی تھی ، یوں بنگلہ دیش نے میزبان ٹیم کو 95 رنز کا ہدف دیا تھا۔

(جاری ہے)

میچ کے 2 روز بارش کی نذر بھی ہوئے تھے ، اس میچ میں بھارتی کرکٹ ٹیم نے تیز بیٹنگ کا منفرد اعزاز بھی حاصل کر لیا۔ بھارت نے بنگلہ دیش کے خلاف دونوں اننگز میں مجموعی طور پر 312 گیندیں کھیل کر 383 رنز بنائے، بھارتی ٹیم کی کانپور ٹیسٹ میں رنز بنانے کی اوسط 7.36 فی اوور رہی۔ ٹیسٹ کرکٹ کی 147 سالہ تاریخ میں پہلی بار کسی ٹیم نے 7 رنز سے زائد کی اوسط سے رنز بنائے۔ اس سے قبل جنوبی افریقہ نے 2005ء میں زمبابوے کے خلاف 6.80 کی اوسط سے رنز بنائے تھے۔