پاکستان اوپن ٹین پن باؤلنگ چیمپئن شپ کی تیاریاں زور و شور سے جاری

کراچی(اُردو پوائنٹ اخبارتازہ ترین - این این آئی۔ 05 نومبر2024ء) پاکستان اوپن ٹین پن باؤلنگ چیمپئن شپ کی تیاریاں زور و شور سے جاری ہیں۔ یہ چیمپئن شپ پاکستان ٹین پن باؤلنگ فیڈریشن کے زیر اہتمام اورسندھ ٹین پن باؤلنگ ایسوسی ایشن کے تعاون سے 18 سے 25 دسمبر تک کراچی میں منعقد ہوگی۔ ان خیالات کا اظہار سندھ ٹین پن باؤلنگ ایسوسی ایشن کے صدر فیڈریشن علیم آغا نے گزشتہ روز کیا۔

(جاری ہے)

انہوں نے کہا کہ چیمپئن شپ میں ملک بھر سے مرد اور خواتین کھلاڑی حصہ لیں گی۔ چیمپئن شپ میں دس کیٹگریز کے مقابلے رکھے گئے ہیں جن میں اوپن سنگلز، سینئرز، گرائنڈ ماسٹرز، ایمچور گرائنڈ،ڈبلز، انڈر24، لیڈیز، فور مینز ٹیم، ڈیف اور میڈیا کی کیٹگریز کے مقابلے رکھے گئے ہیں۔ چیمپئن شپ کے سیمی فائنل 24 دسمبر کو فائنل مقابلے 25 دسمبر کو کھیلے جائیں گے جن کے اختتام پر کامیابی حاصل کرنے والے کھلاڑیوں میں انعامات تقسیم کئے جائیں گے۔