چیمپئنز ٹرافی کی میزبانی،پاکستان کو 60 لاکھ ڈالرز ملیں گے

آئی سی سی اپنی آمدنی سے ہر سال پاکستان کو 13ملین ڈالرکی 2 قسطیں جنوری اور جولائی میں فراہم کرتی ہے: ذرائع

ذیشان مہتاب جمعہ 29 نومبر 2024 14:58

چیمپئنز ٹرافی کی میزبانی،پاکستان کو 60 لاکھ ڈالرز ملیں گے

لاہور (اردو پوائنٹ تازہ ترین اخبار ۔ 29 نومبر 2024ء ) پاکستان میں شیڈول آئی سی سی چیمپئنز ٹرافی 2025ء کی میزبانی سے متعلق آج آئی سی سی کا اہم اجلاس ہوگا جس میں اس حوالے سے حتمی فیصلہ کیا جائے گا۔

(جاری ہے)

ذرائع کے مطابق پاکستان کو آئی سی سی چیمپئنز ٹرافی کی میزبانی کے حقوق کے 60 لاکھ ڈالرز ( تقریبا ایک ارب 66 کروڑ 64 لاکھ پاکستانی روپے) ملیں گے، پاکستان کو ٹورنامنٹ کی انشورنس کرانے کے لیے انشورنس کمپنی کو بھی 12 سے 13 لاکھ ڈالرز (36 کروڑ 10 لاکھ 55 ہزار پاکستانی روپے) بطور پریمیئم ادا کرنے ہوں گے جب کہ پاکستان کو گیٹ منی اور ہاسپیٹلیٹی کی مد میں مزید ڈالرز ملیں گے، اس طرح انشورنس کی رقم نکال کر تقریباً 60 لاکھ ڈالرز ملیں گے۔

ذرائع کا کہنا ہے کہ آئی سی سی اپنی آمدنی سے ہر سال پاکستان کو 13 ملین ڈالرز (4 ارب 52 کروڑ 79 لاکھ پاکستانی روپے) کی 2 قسطیں جنوری اور جولائی میں فراہم کرتی ہے جب کہ اس کے برعکس بھارت کو آئی سی سی کی آمدنی کا 38 فیصد سالانہ شیئر 90 سے 95 ملین ڈالرز (33 ارب 8 کروڑ 86 لاکھ پاکستانی روپے) ملتا ہے۔

وقت اشاعت : 29/11/2024 - 14:58:18