چیمپئنز ٹرافی منسوخ ہوئی تو 3 بورڈز کو چھوڑ کر دنیائے کرکٹ زمین پر آجائیگی، وکرانت گپتا کا دعویٰ

براڈ کاسٹرز اپنے 2 ہزار کروڑ روپے جیب میں ڈالیں گے اور بائے بائے کہیں گے کہ میرے پاس کچھ آنا نہیں تھا خرچہ بچ گیا ہے : بھارتی صحافی

ذیشان مہتاب جمعہ 29 نومبر 2024 20:52

چیمپئنز ٹرافی منسوخ ہوئی تو 3 بورڈز کو چھوڑ کر دنیائے کرکٹ زمین پر آجائیگی، وکرانت گپتا کا دعویٰ

ممبئی (اردو پوائنٹ تازہ ترین اخبار ۔ 29 نومبر 2024ء ) بھارتی صحافی وکرانت گپتا کا دعویٰ ہے کہ اگر چیمپئنز ٹرافی منسوخ ہوئی تو تین بورڈ کو چھوڑ کر دنیائے کرکٹ زمین پر آجائے گی۔

بھارتی اسپورٹس چینل سے گفتگو کرتے ہوئے صحافی وکرانت گپتا نے کہا کہ چیمپئنز ٹرافی کے لیے ہائبرڈ ماڈل ٹھیک ہے اگر یہ کینسل ہوگیا یا ٹورنامنٹ ہی منسوخ ہوگیا تو بھارت، آسٹریلیا اور انگلینڈ کو چھوڑ کر دنیائے کرکٹ زمین پر آجائے گی۔

انہوں نے کہا کہ جو آئیوری کوسٹ کی ٹیم 7 رنز پر آؤٹ ہوئی ہے پیسے تو ان کو بھی جاتے ہیں تو دنیا زمین پر آجائے گی صرف ایک بندے کا فائدہ ہوگا وہ براڈ کاسٹرز ہیں، وہ اپنے 2 ہزار کروڑ روپے جیب میں ڈالیں گے اور بائے بائے کہیں گے کہ میرے پاس کچھ آنا نہیں تھا خرچہ بچ گیا ہے۔

(جاری ہے)

واضح رہے کہ پاکستان میں شیڈول چیمپیئنز ٹرافی کے لیے انٹرنیشنل کرکٹ کونسل (آئی سی سی) کی بورڈ میٹنگ شروع ہوتے ہی ملتوی کردی گئی۔

ذرائع کے مطابق انٹرنیشنل کرکٹ کونسل (آئی سی سی) کی آج ہونے والی بورڈ میٹنگ 10 سے 15 منٹ تک جاری رہی، آئی سی سی نے فیصلہ کیا کہ میٹنگ اگلے 24 سے 48 گھنٹے میں دوبارہ ہوگی۔

ذرائع کا کہنا ہے کہ آئی سی سی میٹنگ میں تمام بورڈ ممبران شامل تھے، پاکستان اپنے موقف پر قائم ہے کہ ہائبرڈ ماڈل پر ٹورنامنٹ نہیں کروائیں گے۔ آئی سی سی کی جانب سے معاملے کو حل کرنے کے لیے مختلف آپشنز پر غور کیا جارہا ہے۔

ذرائع کا کہنا ہے کہ امید ہے کوئی حل طلب فارمولا کل نکال لیا جائے۔

یاد رہے کہ چیئرمین پی سی بی محسن نقوی واضح طور پر ہائبرڈ ماڈل کو مسترد کر چکے ہیں اور کئی بار دوٹوک موقف اختیار کرتے ہوئے کہا ہے کہ پاکستان ٹورنامنٹ کا میزبان ہے اور مکمل ایونٹ اپنے ہی ملک میں کرائے گا۔

وقت اشاعت : 29/11/2024 - 20:52:02