چیمپئنز ٹرافی: رواں ہفتے ہی کسی فیصلے کا امکان بڑھ گیا

بیشتر معاملات پر بھارتی بورڈ، آئی سی سی اور پی سی بی کے درمیان اتفاق ہوچکا : ذرائع

ذیشان مہتاب بدھ 11 دسمبر 2024 11:36

چیمپئنز ٹرافی: رواں ہفتے ہی کسی فیصلے کا امکان بڑھ گیا

لاہور (اردو پوائنٹ تازہ ترین اخبار ۔ 11 دسمبر 2024ء ) آئی سی سی چیمپئنز ٹرافی کے حوالے سے رواں ہفتے ہی کسی فیصلے کا امکان بڑھ گیا۔ پاکستان کرکٹ بورڈ (پی سی بی) کے ٹاپ آفیشلز ایک بار پھر دبئی پہنچ کر انٹرنیشنل کرکٹ کونسل (آئی سی سی) کیساتھا مذاکرات میں مصروف ہیں جبکہ ذرائع کا بتانا ہے کہ بیشتر معاملات پر اتفاق ہوچکا ہے۔

تفصیلات کے مطابق چیمپئینز ٹرافی کیلئے بھارت نے اپنی ٹیم کو پاکستان بھیجنے سے انکار کردیا تھا، وہ ہائبرڈ ماڈل کے تحت اپنے میچز متحدہ عرب امارات (یو اے ای) میں کھیلنا چاہتا ہے، پی سی بی نے بھی سخت موقف اپنایا اور پارٹنر شپ یا فیوژن فارمولہ پیش کردیا، اس کے تحت آئندہ 3 برس تک دونوں ممالک میں ہونے والے آئی سی سی ایونٹس میں ان کی ٹیمیں اپنے میچز یو اے ای میں کھیلیں گی۔

(جاری ہے)

ابتدا میں بھارت نے ناز نخرے دکھائے البتہ پھر بیشتر شرائط مان لیں، البتہ بعض پر اعتراض جاری رہا جس کی وجہ سے تاحال چیمپئنز ٹرافی کا شیڈول بھی جاری نہیں ہوسکا۔ اس حوالے سے گزشتہ 2،3 دن خاموشی چھائی رہی البتہ ذرائع کے مطابق پس پردہ مذاکرات جاری ہیں، پی سی بی کے سابق سی او او سلمان نصیر گزشتہ کئی روز سے دبئی میں ہی موجود ہیں جبکہ موجودہ سی او او سمیر سید بھی وہاں پہنچ چکے ہیں۔

دونوں کی گزشتہ روز بھی آئی سی سی حکام سے بات چیت جاری رہی، بھارتی بورڈ کے ساتھ اب براہ راست مذاکرات نہیں ہو رہے بلکہ عالمی کونسل معاونت کر رہی ہے۔

پاکستان نے بھارتی ٹیم کے نہ آنے پر مالی نقصان کی تلافی کیلئے بعض تجاویز دی تھیں ان پر ڈیڈ لاک قائم ہوگیا البتہ اب معاملات مثبت سمت میں آگے بڑھتے دکھائی دے رہے ہیں۔

رواں ہفتے ہی چیمپئنز ٹرافی کے معاملے پر کوئی اعلان ہوسکتا ہے، پی سی بی خود بھی چاہتا ہے کہ مسئلہ جلد حل ہو کیونکہ اسے ایونٹ کیلئے ٹکٹنگ سمیت دیگر انتظامات بھی کرنا ہیں۔

وقت اشاعت : 11/12/2024 - 11:36:52