پاکستان سٹرائیک فورس کا تربیتی کیمپ نیشنل کرکٹ اکیڈمی میں شروع

منگل 14 جنوری 2025 16:30

راولپنڈی (اُردو پوائنٹ اخبارتازہ ترین - اے پی پی۔ 14 جنوری2025ء) پاکستان سٹرائیک فورس کا تربیتی کیمپ نیشنل کرکٹ اکیڈمی میں شروع ہو گیا ہے۔ پاکستان کرکٹ بورڈ(پی سی بی )کے مطابق کیمپ کا مقصد ڈومیسٹک اور انٹرنیشنل کرکٹرز میں جدید دور کی بیٹنگ اور ہارڈ ہٹنگ کی مہارتوں پر کام کرنا ہے۔کیمپ 14 سے 30 جنوری تک این سی اے میں جاری رہے گا اور کیمپ کا دوسرا مرحلہ یکم سے 28 فروری تک ہو گا۔

سٹرائیک فورس کیمپس ایمرجنگ اور ایلیٹ کھلاڑیوں کے لیے پورے سال کے لیے پلان کیے گئے ہیں۔تربیتی کیمپ سابق انٹرنیشنل کرکٹر عبدالرزاق کی زیرنگرانی ہو گا ، سابق ٹیسٹ کرکٹر ہمایوں فرحت اور سابق فرسٹ کلاس کھلاڑی کامران ساجد، عبدالرزاق کی معاونت کریں گے۔سٹرائیک فورس کیمپ میں بلائے گئے 25 کھلاڑیوں کو اس حوالے سے رہنمائی کی جائے گی کہ کس طرح پریشر میں کارکردگی کی جاتی ہے اور طاقت کے ساتھ جارحانہ اور تحمل کے ساتھ کس طرح بڑی کرکٹ میں بیٹنگ کی جاتی ہے۔

(جاری ہے)

آئی سی سی چیمپئنز ٹرافی 2025 کے بعد 2028 تک پاکستان کو دو آئی سی سی ٹی 20 ورلڈ کپ، ایک آئی سی سی کرکٹ ورلڈ کپ اور متعدد دوطرفہ وائٹ بال سیریز کھیلنی ہیں ۔ اس کیمپ سے قومی سیٹ اپ اور ڈومیسٹک ٹیموں کی بیٹنگ کے لیے معیاری بینچ سٹرینتھ بڑھانے میں بھی مدد ملے گی۔پاکستان سٹرائیک فورس کیمپ میں شامل کھلاڑیوں میں عبدالصمد، آفاق احمد ، علی عمران، عماد بٹ ، عاشر محمود ، حیدر علی ، حسن نواز ، جہانداد خان ، خواجہ محمد نافع ، خیام خان ، خوشدل شاہ ، محمد عباس آفریدی ، محمد عامر برکی ، محمد فائق ، محمد فیضان ، محمد سرور آفریدی ، مبصر خان ، محمد اخلاق ، محمد عمران رندھاوا ، محمد عرفان خان ، ناصر نواز ، سعد مسعود ، شاویز عرفان ، عثمان خان اور یاسر خان شامل ہیں، سٹرائیک فورس کیمپ کا حصہ بننے والے 7کھلاڑی انٹرنیشنل کرکٹ کھیل چکے ہیں۔

وقت اشاعت : 14/01/2025 - 16:30:49