سابق آسٹریلوی لیگ سپنر منشیات سمگلنگ ملوث نکلے، مجرم قرار

54 سالہ کرکٹر کو رواں برس کے آخر میں سزا سنائے جانے کے عمل کا سامنا کرنا پڑے گا : رپورٹس

ذیشان مہتاب جمعرات 13 مارچ 2025 11:19

سابق آسٹریلوی لیگ سپنر منشیات سمگلنگ ملوث نکلے، مجرم قرار

سڈنی (اردو پوائنٹ تازہ ترین اخبار ۔ 13 مارچ 2025ء ) سابق آسٹریلوی ٹیسٹ کرکٹر اسٹیورٹ میک گل کو منشیات اسمگلنگ میں ملوث ہونے کا "مجرم" قرار دیدیا گیا۔

میڈیا رپورٹس کے مطابق آسٹریلیا کی ڈسٹرکٹ کورٹ میں 8 روز سے جاری منشیات اسمگلنگ کے مقدمے میں جمعرات کو فیصلہ سنایا گیا۔

عدالت کا کہنا ہے کہ سابق انٹرنیشنل آسٹریلوی کرکٹر اسٹیورٹ میک گل کو انکے بہنوئی اور ڈیلر کے درمیان کوکین کے سودے میں ملوث ہونے کا قصور وار پایا گیا ہے تاہم کرکٹر کو ممنوعہ ادویات کی فراہم کرنے سے متعلق الزامات سے بری کردیا گیا تھا۔

مقدمے کی سماعت کے دوران، عدالت کو بتایا گیا کہ میک گل نے اپریل 2021 میں اپنے بہنوئی مارینو سوتیروپولوس اور ایک ڈیلر کیساتھ ملکر نیوٹرل بے ریسٹورنٹ میں ایک میٹنگ کا اہتمام کیا تھا اور شرکت کی تھی۔

(جاری ہے)

اس ڈیل میں ایک کلو گرام کوکین کے بدلے $330,000 دینے پر اتفاق ہوا تاہم کرکٹر کو کبھی منشیات کیساتھ نہیں دیکھا گیا اور نہ ہی انکے پاس سے پیسے برآمد ہوئے ہیں لیکن سہولت کاری کے مرتکب ہوئے ہیں۔

آسٹریلوی میڈیا کے مطابق سٹورٹ میک گل کو رواں برس کے آخر میں سزا سنائے جانے کے عمل کا سامنا کرنا پڑے گا۔

سٹورٹ میک گل نے بین الاقوامی کیریئر سابق لیجنڈری سپنر شین وارن کیساتھ شروع کیا، انہوں نے 1998ء سے 2008ء کے درمیان 44 ٹیسٹ کھیلے، انہیں زیادہ تر مواقع آنجہانی شین وارن کی عدم موجودگی میں ملے، سابق ٹیسٹ کرکٹر نے 29.02 کی اوسط اور 54.02 کے سٹرائیک ریٹ کے ساتھ 208 وکٹیں لے کر اپنے کیریئر کا اختتام کیا۔

54 سالہ لیگ سپنر آسٹریلیا کیلئے سب سے زیادہ وکٹیں لینے والے پانچویں سپنر ہیں۔

وقت اشاعت : 13/03/2025 - 11:19:53