چوتھا ٹی ٹونٹی ، نیوزی لینڈ نے پاکستان کو 115 رنز سے ہرا کر سیریز اپنے نام کرلی

جیکب ڈفی نے 4، زکیری فولکس نے 3 جبکہ ول او رورک اور جیمز نیشم نے ایک ایک وکٹ حاصل کی

ذیشان مہتاب اتوار 23 مارچ 2025 14:32

ماؤنٹ مانگا نوئی (اردو پوائنٹ تازہ ترین اخبار ۔ 23 مارچ 2025ء ) نیوزی لیںڈ نے سیریز کے چوتھے ٹی20 میچ میں پاکستان کو 115 رنز سے شکست دیکر سیریز اپنے نام کرلی۔

پاکستان نے چوتھے ٹی ٹونٹی انٹرنیشنل میں ٹاس جیت کر فیلڈنگ کا فیصلہ کیا ، ماؤنٹ مانگا نوئی میں کھیلے جانے والے میچ میں کیوی بلے بازوں نے ابتدا ہی سے جارحانہ کھیل کا مظاہرہ کرتے ہوئے اپنی ٹیم کو 59 رنز کا عمدہ آغاز فراہم کیا، میزبان ٹیم نے 3.5 اوورز میں ہی 50 رنز بٹور لیے۔

حارث رؤف نے اپنے پہلے اوور کی پہلی گیند پر 4 چھکوں اور 3 چوکوں کی مدد سے 22 گیندوں پر44 رنز بنانے والے ٹم سیفرٹ کو خوشدل شاہ کے شاندار کیچ کی بدولت آؤٹ کردیا، تاہم کیوی بلے بازوں نے جارحانہ کھیل کا مظاہرہ جاری رکھا اور 6 اوورز کے پاور پلے میں 79 رنز بناڈالے جبکہ محض 7.2 اوورز میں 100 رنز مکمل کرلیے۔

(جاری ہے)

نیوزی لینڈ کی دوسری وکٹ 108 رنز کے مجموعی اسکور پر گری، 2 چھکوں اور 2 چوکوں کی مدد سے 24 رنز بنانے والے مارک چیپ مین کو حارث رؤف نے کلین بولڈ کیا۔

نیوزی لینڈ کی تیسری وکٹ 134 رنز پر گری، 20 گیندوں پر 50 رنز بنانے والے فن ایلن کو عباس آفریدی نے حسن نواز کے ہاتھوں کیچ آؤٹ کیا جبکہ چوتھی وکٹ 139 رنز پر گری، 3 رنز بنانے والے نیشم ابرار احمد کی گیند پر وکٹ کیپر محمد حارث کے ہاتھوں کیچ آؤٹ ہوئے۔

149 کے مجموعی سکور پر کیویز کو پانچواں نقصان اٹھانا پڑا، 3 رنز بنانے والے مچل ہے کو بھی ابرار احمد نے محمد حارث کے ہاتھوں کیچ آؤٹ کیا۔

نیوزی لینڈ کی چھٹی وکٹ 206 رنز پر گری، 29 رنز بنانے والے ڈیرل مچل کو حارث رؤف نے عرفان خان کے ہاتھوں کیچ آؤٹ کیا۔

میچ کے اختتامی اوورز میں کپتان مائیکل بریسویل نے 26 گیندوں پر 46 رنز کی اننگز کھیلی۔

پاکستان کی جانب سے حارث رؤف نے 3، ابرار نے 2 جبکہ عباس آفریدی نے ایک وکٹ حاصل کی۔

ہدف کے تعاقب میں پاکستان کا آغاز نہایتی مایوس کُن رہا، اوپنر محمد حارث 2، خوشدل شاہ 6، حسن نواز، کپتان سلمان آغا اور شاداب خان ایک ایک رن بناکر پویلین روانہ ہوئے۔

گرین شرٹس کی جانب سے عرفان خان نیازی نے سب سے زیادہ 26 رنز بنائے اور وکٹ گنوا بیٹھے۔

نیوزی لینڈ کی جانب سے جیکب ڈفی نے 4 جبکہ ول او رورک اور زکیری فولکس نے ایک ایک وکٹ حاصل کی۔

چوتھے ٹی ٹونٹی کے لیے پاکستانی اسکواڈ میں کوئی تبدیلی نہیں کی گئی جبکہ نیوزی لینڈ کی ٹیم میں 2 تبدیلیاں کی گئی ہیں، کیلی جیمیسن اور بین سیئرز کی جگہ وِل اورورک اور جیکب ڈفی کو ٹیم میں شامل کیا گیا۔

وقت اشاعت : 23/03/2025 - 14:32:10