ریجنل انٹر ڈسٹرکٹ سینئر کرکٹ ٹورنامنٹ ، اسلام آباد، فیصل آباد اور پشاور ریجنز میں میچز کا آغاز پیر سے ہو گا

راولپنڈی (اُردو پوائنٹ اخبارتازہ ترین - اے پی پی۔ 15 جون2025ء) پاکستان کرکٹ بورڈ کے زیر اہتمام ریجنل انٹر ڈسٹرکٹ سینئر کرکٹ ٹورنامنٹ میں اسلام آباد، فیصل آباد اور پشاور ریجنز میں میچز کا آغاز (کل)پیر سے ہو گا۔ ٹورنامنٹ ملک بھر کے 16 ریجنز میں منعقد کیا جا رہا ہے جس میں مجموعی طور پر 110 ٹیمیں تین روزہ میچز کھیلیں گی۔

(جاری ہے)

پی سی بی کا کہنا ہے کہ ان ٹیموں میں کھلاڑیوں کا انتخاب اپریل اور مئی میں منعقدہ چیلنج لیگ (دو روزہ) اور پریذیڈنٹ ٹرافی گریڈ ٹو میں ان کی کارکردگی کی بنیاد پر کیا گیا ہے۔

یہ ٹورنامنٹ مستقبل کی قائد اعظم ٹرافی کے لیے باصلاحیت کھلاڑیوں کے چناؤ کا ذریعہ بنے گا۔ واضح رہے کہ کوئٹہ ریجن میں 19 جون جبکہ حیدر آباد اور راولپنڈی ریجنز میں 20 جون سے مقابلے شروع ہوں گے۔ ڈیرہ مراد جمالی 21 جون سے ٹورنامنٹ کی میزبانی کرے گا اور کراچی ریجن میں میچز 27 جون سے کھیلے جائیں گے۔