راشد نسیم دنیا کے تیز ترین باکسنگ پنچ مارنے والے کھلاڑی بن گئے، پاکستان کے لیے 154 واں عالمی ریکارڈ

اسلام آباد (اُردو پوائنٹ اخبارتازہ ترین - اے پی پی۔ 01 جولائی2025ء) پاکستان کے عالمی شہرت یافتہ مارشل آرٹسٹ راشد نسیم نے ایک اور اعزاز اپنے نام کر لیا ہے۔ انہوں نے دنیا کے تیز ترین باکسنگ پنچ مارنے والے کھلاڑی کا عالمی ریکارڈ قائم کر کے نہ صرف انگلینڈ کے جوشے لییالا کو شکست دی بلکہ پاکستان کے لیے 154 واں عالمی ریکارڈ فلسطین کے نام کر دیا۔راشد نسیم نے ایک منٹ میں 386 مرتبہ باکسنگ پنچز سے ٹارگٹ کو ہٹ کر کے جوشے لییالا کے سابقہ ریکارڈ 374 پنچز کو پیچھے چھوڑ دیا۔

گنیز ورلڈ ریکارڈز نے اس کامیابی کی آفیشل تصدیق کر دی ہے اور ریکارڈ کو اپنی ویب سائٹ پر بھی اپ ڈیٹ کر دیا ہے۔یہ راشد نسیم کا انفرادی طور پر 129 واں عالمی ریکارڈ ہے جبکہ ان کی مارشل آرٹس اکیڈمی "بنیان المرصوص" پاکستان میں سب سے زیادہ عالمی ریکارڈز بنانے والی اکیڈمی بن گئی ہے جہاں اب تک 150 ریکارڈز قائم کیے جا چکے ہیں۔

(جاری ہے)

گنیز ورلڈ ریکارڈز نے حال ہی میں ان کے مزید 3 ریکارڈز کی بھی منظوری دی ہے۔

راشد نسیم دنیا میں سب سے زیادہ پنچ کیٹیگری میں عالمی ریکارڈ بنانے کا اعزاز رکھتے ہیں۔ انہوں نے ایک گھنٹے میں 32,686 پنچز کا اور ایک گھنٹے میں ایک کلو وزن کے ساتھ 24,000 سے زائد پنچز ٹارگٹ پر مارنے کا ریکارڈ قائم کیا۔ اسی طرح ایک منٹ میں ایک کلو وزن کے ساتھ 675، تین منٹ میں 1896 اور ایک کلو وزن کے ساتھ 1778 فل کانٹیکٹ پنچز کا ریکارڈ بھی ان کے نام ہے جو تاحال دنیا میں کوئی نہیں توڑ سکا۔

حال ہی میں راشد نسیم نے ایک ہاتھ میں انڈا پکڑ کر 207 فل ایکسٹینشن پنچز مارنے کا ریکارڈ اور ایک ہاتھ سے ایک کلو وزن کے ساتھ 163 پنچز کا ریکارڈ بھی قائم کیا جو ان کی غیر معمولی صلاحیتوں کا منہ بولتا ثبوت ہے۔واضح رہے کہ راشد نسیم نہ صرف پاکستان بلکہ دنیا میں سب سے زیادہ انفرادی عالمی ریکارڈز کے حامل کھلاڑی ہیں۔ وہ اب تک بھارت کے 40 سے زائد ریکارڈز توڑ چکے ہیں جبکہ انگلینڈ، چین، اٹلی، ایران، مصر، جرمنی، سربیا اور سوئٹزرلینڈ کے ریکارڈز بھی پیچھے چھوڑ چکے ہیں۔ راشد نسیم وہ واحد پاکستانی ہیں جو اٹلی، جرمنی، رومانیہ، چین، کوریا، سنگاپور اور سپین سمیت کئی ممالک میں انٹرنیشنل شوز میں پاکستان کی نمائندگی کر چکے ہیں۔