بھارت اور جنوبی افریقہ کے درمیان دوسرے ٹیسٹ میچ کے چوتھے روز بھی بارش حائل ہوگئی

بنگلور(اُردو پوائنٹ اخبارتازہ ترین - این این آئی۔17 نومبر۔2015ء) بھارت اور جنوبی افریقہ کے درمیان بنگلور میں کھیلے جانے والے دوسرے ٹیسٹ میچ کا چوتھا دن بھی تیسرے اور دوسرے دن کی طرح بارش سے متاثر ہوا ہے۔بھارتی وقت کے مطابق امپائروں نے دن میں ایک بجے فیلڈ کا معائنہ کیا اور کہا کہ کھیل دو بجے سے شروع کر دیا جائے گا لیکن اس دوران پھر سے بارش کی بوندیں پڑنے لگیں اور میدان پر کورز ڈال دیئے گئے۔

خیال رہے کہ اس سے قبل میچ کے دوسرے اور تیسرے دن کے کھیل کے اختتام کا اعلان بغیر کوئی گیند پھینکے کر دیا گیا تھا۔یہ بارش جنوبی بھارت کے مشرقی ساحل پر طوفانی صورت حال کے نتیجے میں ہو رہی ہے۔میچ کے تیسرے دن دونوں ٹیموں کے کھلاڑی ہوٹل میں ہی رہے اور باضابطہ طور پر تیسرے دن کے کھیل کے اختتام کا اعلان کر دیا گیا۔

(جاری ہے)

اس سے قبل بھارت نے ٹاس جیت کر جنوبی افریقہ کو بیٹنگ کی دعوت دی تھی اور جنوبی افریقہ کی پوری ٹیم پہلی اننگز میں 214 رنز بنا کر پویلین لوٹ گئی تھی۔

جواب میں بھارت نے اپنی پہلی اننگز میں بغیر کسی نقصان کے 80 رنز بنا لیے تھے۔بھارت کو جنوبی افریقہ کی برتری ختم کرنے کے لیے مزید 134 رنز کی ضرورت ہے اور پہلی اننگز میں اس کی تمام وکٹیں باقی ہیں۔بھارت کی جانب سے مرلی وجے اور شیکھر دھون نے اننگز کا آغاز کیا اور دونوں بالترتیب 28 اور 45 رنز پر کھیل رہے ہیں۔جنوبی افریقہ کا آغاز اچھا نہ تھا اور صرف 78 رنز کے مجموعی سکور پر اس کے چار کھلاڑی آوٴٹ ہو گئے۔

جنوبی افریقہ کی جانب سے اے بی ڈویلیئرز نے 11 چوکوں اور ایک چھکے کی مدد سے 85 جبکہ ڈین ایلگر نے دو چوکوں اور ایک چھکے کی مدد سے 38 رنز بنائے۔ان دونوں کے علاوہ جنوبی افریقہ کے دیگر بیٹسمین بھارتی بولروں کا سامنا نہ کر سکے۔بھارت کی جانب سے ایشون اور جڈیجا نے چار، چار کھلاڑیوں کو آوٴٹ کیا۔چار میچوں کی سیریز میں بھارت کو ایک صفر کی برتری حاصل ہے۔موہالی میں کھیلے جانے والے پہلے ٹیسٹ میں بھارت نے جنوبی افریقہ کو 108 رنز سے شکست دی تھی۔