رکی پونٹنگ نے بھارتی آف اسپنر ہربھجن سنگھ کو اپنے کیریئر میں سب سے بڑا دشمن قرار دیدیا

ممبئی(اُردو پوائنٹ اخبارتازہ ترین - این این آئی۔6 ستمبر ۔2016ء) آسٹریلیا کے سابق کپتان اور عظیم بلے باز رکی پونٹنگ نے بھارتی آف اسپنر ہربھجن سنگھ کو اپنے کیریئر میں سب سے بڑا دشمن قرار دیتے ہوئے کہا ہے کہ اب بھی مجھے ان کے ڈراؤنے خواب آتے ہیں۔

(جاری ہے)

صحافیوں سے گفتگو کرتے ہوئے دنیا کے سب سے کامیاب کپتانوں میں سے ایک اور بہترین آسٹریلوی بلے باز رکی پونٹنگ نے بتایا کہ جب وہ بھارت کے خلاف کھیل رہے ہوتے تھے تو آف اسپنر ہربھجن سنگھ ان کے سب سے بڑے حریف ہوا کرتے تھے اور وہ اب بھی میرے خوابوں میں آکر مجھے ڈراتے ہیں۔

واضح رہے کہ رکی پونٹنگ کو ٹیسٹ میچز میں ہربھجن سنگھ نے سب سے زیادہ 10 مرتبہ آؤٹ کیا ٗ پونٹنگ کا شمار کرکٹ کی تاریخ کے کامیاب ترین کپتان اور بہترین بلے بازوں میں ہوتا ہے اور انہوں نے ٹیسٹ کرکٹ میں سچن ٹنڈولکر کے بعد سب سے زیادہ 13 ہزار 378 رنز بنا رکھے ہیں جب کہ ون ڈے کرکٹ میں بھی وہ تیسرے نمبرپر موجود ہیں۔