ڈیوڈ وارنر لگاتار دوسرے سال ایلن بارڈر میڈل حاصل کرنے والے چوتھے آسٹریلوی پلیئر بن گئے

سڈنی (اُردو پوائنٹ اخبارتازہ ترین - آن لائن۔ 23 جنوری2017ء) آسٹریلیا کے اوپنر ڈیوڈ وارنر نے لگاتار دوسرے سال ایلن بارڈر میڈل حاصل کرکے یہ اعزاز پانے والے چوتھے آسٹریلوی کھلاڑی بن گئے ہیں۔30 سالہ ڈیوڈ وارنر کو سال کے بہترین آسٹریلوی کھلاڑی کے ایوارڈ کے علاوہ آسٹریلیا کی ایک روزہ کرکٹ کے سال کا بہترین کھلاڑی بھی قرار دیا گیا۔ڈیوڈ وارنر نے سال 2016 میں بہترین کارکردگی کا مظاہرہ کرتے ہوئے تمام طرز میں 2 ہزار 420 رنز بنائے اور لگاتاردوسری مرتبہ ایلن بارڈر ایوارڈ حاصل کرکے رکی پونٹنگ، شین واٹسن اور مائیکل کلارک کی فہرست میں شامل ہوگئے ہیں۔

ایلن بارڈر ایوارڈ کے لیے وارنر کا مقابلہ اپنے کپتان اسٹیواسمتھ سے تھا جنھیں 248 ووٹ ملے تھے تاہم وارنر 269ووٹ کے ساتھ ان سے یہ ایوارڈ چھیننے میں کامیاب ہوئے۔

(جاری ہے)

آسٹریلوی بورڈ کے اعلامیے کے مطابق وارنر نے اس موقع پر کہا کہ 'ساتھی کھلاڑیوں کا شکریہ اور کپتان اسٹیو اسمتھ، آپ سب کے بغیر میں یہاں نہیں ہوتا کیونکہ یہ ٹیم گیم ہی'۔انھوں نے سابق کھلاڑیوں کا شکریہ ادا کرتے ہوئے کہا کہ 'سابق کھلاڑیوں کا بھی شکریہ کیونکہ آپ نے جوکچھ ماضی میں کیا ہے اس کے بغیر ہم اپنے خواب کی تعبیر حاصل کرنے کے قابل نہیں ہوتی'۔

فاسٹ باؤلر مچل اسٹارک کو ٹیسٹ کرکٹ میں شاندار کارکردگی پر سال کا بہترین آسٹریلوی کھلاڑی قرار دیا گیا۔آل راؤنڈر شین واٹسن نے ٹی ٹوئنٹی میں 150.51 کی اسٹرائیک ریٹ سے 298 رنز بنائے جبکہ 9 وکٹیں بھی حاصل کیں جس پر انھیں ریکارڈ تیسری مرتبہ ٹی ٹوئنٹی کا سال کا بہترین کھلاڑی قرار دیا گیا۔پاکستان کے خلاف ٹیسٹ کرکٹ میں ڈیبیو کرنے والے ویسٹرن آسٹریلیا کے آل راؤنڈر ہلٹن کیٹررائٹ کو بریڈ مین نوجوان کرکٹر کا ایوارڈ دیا گیا۔یاد رہے کہ اس سے قبل یہ ایوارڈ گلین مک گرا، اسٹیووا، ایڈم گلکرسٹ اور موجودہ کپتان اسٹیو اسمتھ کو دیا گیا تھا۔۔