ایف آئی اے معطل کرکٹرز کیخلاف کارروائی روک دے ، نجم سیٹھی

لاہور(اُردو پوائنٹ اخبارتازہ ترین - آن لائن۔ 21 مارچ2017ء) چیرمین پاکستان سپر لیگ نجم سیٹھی نے ایف آئی اے سے معطل کرکٹرز کے خلاف کارروائی روکنے کی درخواست کرتے ہوئے کہا ہے کہ کھلاڑیوں کے خلاف کارروائی کرنا پی سی بی کا کام ہے۔ تفصیلات کے مطابق نجم سیٹھی نے کہا کہ اسپاٹ فکسنگ میں ملوث قومی کرکٹرز کے خلاف انکوائری کررہے ہیں لہٰذا ایف آئی اے کرکٹرز کے خلاف کارروائی روک دے کیوں کہ ان کے خلاف کارروائی کرنا پاکستان کرکٹ بورڈ کا کام ہے۔

نجم سیٹھی کا کہنا تھا کہ ہم نے ایف آئی اے کو انکوائری کیلئے کوئی خط نہیں لکھا خط میں صرف موبائل فون ڈیٹا کی تصدیق کی اپیل کی ہے جب کہ ایف آئی اے کو بکیز کے خلاف کارروائی کرنی چاہیے تاہم تحقیقات کے بعد ایف آئی اے کھلاڑیوں سے پوچھ گچھ کرے تو کوئی مسئلہ نہیں۔

(جاری ہے)

چیرمین پی ایس ایل نے مزید کہا کہ اسپاٹ فکسنگ کیس میں معطل کرکٹرز کے خلاف ٹھوس شواہد ہیں جو ہم ثابت کریں گے اور اس کے لیے پاکستان کرکٹ بورڈ کا ٹربیونل جمعہ سے کارروائی شروع کرے گا۔

واضح رہے کہ وفاقی وزیر داخلہ چوہدری نثار کی ہدایت کے بعد وفاقی تحقیقاتی ادارے (ایف آئی ای) نے اسپاٹ فکسنگ کیس میں معطل کرکٹرز کے خلاف کارروائی کا آغاز کردیا ہے جس کے تحت کرکٹرز کے بیانات ریکارڈ کیے گئے اور ان کے موبائل فون کا ڈیٹا بھی حاصل کیا گیا ہے جب کہ چوہدری نثار نے کرکٹرز کے نام ای سی ایل میں ڈالنے کا بھی حکم دیا ہے۔