ریسلنگ میں طویل عرصہ حکمرانی کرنے والے انڈر ٹیکر نے ریٹائرمنٹ کا اعلان کردیا

نیویارک(اُردو پوائنٹ اخبارتازہ ترین - آئی این پی۔ 03 اپریل2017ء)ریسلنگ کے رنگ پر سب سے زیادہ عرصے تک حکمرانی کرنے والے انڈر ٹیکر نے باقاعدہ طور پر ریٹائرمنٹ کا اعلان کردیا۔عظیم ریسلر33ویں ریسل مینیا میں رومن رینز سے لڑنے کیلئے اپنے مخصوص انداز میں رنگ میں جلوہ گر ہوئے تاہم مقابلے کے دوران قسمت نے ان کا ساتھ نہ دیا اور وہ اپنے کیریئر کا آخری میچ ہار نے کے بعد پروقار انداز میں اپنے دستانے ، ہیٹ اور کوٹ رنگ میں چھوڑکر رخصت ہوئے۔

(جاری ہے)

52 سالہ انڈر ٹیکرنے 1984ء میں پروفیشنل ریسلر کے طور پر کیریئر کا آغاز کیا اور انہیں سب سے زیادہ عرصے تک رنگ میں رہنے والے ریسلر ہونے کا اعزاز حاصل ہے ،انہوں نے 33سالوں پر محیط اپنے کیریئر کے دوران لاتعداد مقابلے جیتے اور پوری دنیا کے دلوں کے فاتح قرار پائے۔انڈر ٹیکر کو ’’ڈیڈ مین‘‘،’’ بڑی برائی‘‘،’’ موت کی وادی کا شیطان ’‘‘اور’’ اندھیرے کا شہزادہ‘‘ کے ناموں سمیت کئی ناموں سے جانا جاتا ہے۔انڈر ٹیکر کو 2013ء میں ڈیجیٹل سپائی پول کے دوران دنیا کا عظیم ترین ریسلر قرار دیا گیا جبکہ ایک اور سروے میں انہیں دنیا کا سب سے قابل احترام ریسلر بھی قرار دیا گیا۔