متعلقہ اداروں کو ممکنہ سیلاب او رمون سون کی بارشوں کے پیشِ نظر حفاظتی اقدامات کو یقینی بنانے ہدایت

سرگودھا۔28 جون(اُردو پوائنٹ اخبارتازہ ترین - اے پی پی۔ 28 جون2018ء) ڈپٹی کمشنر سرگودہا مظفر خان سیال نے متعلقہ اداروں کو ممکنہ سیلابی صورتحال او رمون سون کی بارشوں کے پیش نظر تمام حفاظتی اقدامات کو یقینی بنانے او رانتظامات مکمل کرنے کی ہدایت کی ہے ۔ انہوں نے ضلع بھر سے گزرنے والے دریاؤں کے حفاظتی پشتوں کااز سر نو سروے کر کے خامیوں کو فوری دور کرنے او رعلاقوں سے بارش یا سیلابی پانی کے انخلاء کیلئے فوری طو رپر واٹر پمپس خریدنے کی بھی ہدایت کی ہے ۔

وہ آج ڈسٹرکٹ ڈیزاسٹر مینجمنٹ کمیٹی ‘ریسکیو 1122 اور پی ڈی ایم اے کے مشترکہ اجلاس سے خطاب کر رہے تھے ۔ اجلاس میں اسسٹنٹ کمشنر سرگودہا عدنان شہزاد ‘ ایڈیشنل کمشنر فاروق حیدر عزیز ‘ سی او ہیلتھ اتھارٹی ڈاکٹر محمد اسلم چوہدری ‘ ڈسٹرکٹ ایمر جنسی آفیسر مظہر شاہ او رپی ڈی ایم اے کے منیجر لقمان حیدر کے علاوہ متعلقہ اداروں کے افسران نے شرکت کی۔

(جاری ہے)

ڈپٹی کمشنر نے محکمہ لائیوسٹاک کو تمام جانوروں کی ویکسنیشن فوری کرنے کی بھی ہدایت کی ۔ انہوں نے ریسکیو 1122کو ممکنہ سیلات سے نمٹنے کیلئے موک ایکسرسائز کو جاری رکھنے کی ضرورت پر زور دیا ۔ اس موقع پر ڈسڑکٹ ایمرجنسی آفیسر مظہر شاہ نے بریفنگ میں بتا یاکہ ریسکیو 1122 کے پاس آٹھ ایمبولینس ‘پانچ آگ بجھانے والی گاڑیاں اور پندرہ کشتیاں دستیاب ہیں۔

ریسکیو 1122 کاعملہ 309افراد پر مشتمل ہے ۔ ضلع بھر میں مریضوںکی منتقلی سروس کے ذریعے اب تک 7528مریضوں کو چھوٹے ہسپتالوں سے بڑے ہسپتالوں میں منتقل کیاگیاہے ۔ اس طرح موٹر سائیکل سروس کے ذریعے اب تک 5179افراد کو ایمر جنسی میں طبی امداد فراہم کی گئی ۔ انہوں نے بتایا کہ سرگودہا کی تمام تحصیلوں میں 1122 کے دفاتر تعمیر کے آخری مراحل میں داخل ہو چکے ہیں ۔

اجلاس میں پی ڈی ایم اے کے جی ایم لقمان حیدر نے بریفنگ دیتے ہوئے بتایاکہ پی ڈی ایم اے سرگودہا میں 16 مختلف منصوبہ جات پر کام کر رہاہے ۔ اب تک ضلع بھر کے سیلاب سے متاثرہ 38موضعات کاسروے مکمل کیا جاچکاہے ۔ ڈپٹی کمشنر نے پی ڈی ایم اے کو اپنا کنٹرول روم ریسکیو 1122کے مرکزی دفتر منتقل کرنے کی ہدایت کی ۔ اس موقع پر متعلقہ لائیوسٹاک کی طرف سے دی گئی بریفنگ میں بتایا گیاکہ ضلع بھر میں ایک جاری شیڈول کے تحت تمام موضعات میں جانوروں کی ویکسنیشن کی جارہی ہے ۔