جرائم پیشہ اور منشیات فروشی میں ملوث ملزمان کے خلاف کریک ڈاون

پشاور۔ (اُردو پوائنٹ اخبارتازہ ترین - اے پی پی۔ 17 جنوری2019ء) پشاورپولیس نے مختلف جرائم پیشہ اور منشیات فروشی میں ملوث ملزمان کے خلاف کریک ڈاون کے دوران 18 ملزمان کو گرفتار کر لیا ہے جن کے قبضہ سے 8 کلو گرام چرس، ایک سو گرام سے زائد ہیرؤن، 1 عدد ایم 16 رائفل، 10 عدد پستول ، ایک عدد بندوق اور سینکڑوں عدد مختلف بور کے کارتوس برآمد کر لئے ہیں ، تمام ملزمان کے خلاف مقدمات درج کرکے مزید تفتیش کیلئے حوالات منتقل کر دیاگیا ہے تفصیلات کے مطابق ایس ایس پی آپریشن کی ہدایت پر پشاور پولیس نے ضلع بھر میں مختلف جرائم میں ملوث افراد کے خلاف کارروائیوں کے ساتھ ساتھ متعدد منشیات فروشوں کو بھی گرفتار کر لیا ہے جن کے قبضہ سے بھاری مقدار میں منشیات اور غیر قانونی اسلحہ بر آمد کر لیا گیا ہے مختلف تھانوں کی حدودمیں ہونے والی کارروائیوں کے دوران تھانہ ارمڑ پولیس نے خفیہ اطلاع پر کارروائی کرتے ہوئے موٹر کار کے ذریعے منشیات سمگلنگ کی کوشش ناکام بناتے ہوئے ایک ملزم سجاد علی ولد امیر نواز سکنہ نوشہرہ کو گرفتار کر لیا ملزم منشیات ضلع خیبر سے نوشہرہ اور پھر پنجاب سمگل کرنے کی کوشش کر رہا تھا جس کے لئے شہر کے نواحی علاقوں کا روٹ استعمال کیا جا رہا تھا ملزم کے قبضہ سے دو کلو گرام اعلی کوالٹی چرس برآمد کر لی گئی ہے اسی طرح تھانہ حیات آباد پولیس نے منشیات فروش امین شاہ ولد تیمور کو گرفتار کر کے ایک کلو گرام چرس، تھانہ فقیر آباد پولیس نے ملزم روح الامین ولد امام احمد کو گرفتار کرکے ایک کلو گرا م چرس، تھانہ پہاڑی پورہ پولیس نے دو ملزمان عامر ولد عجب اور آفتاب ولد میر اقبال کو گرفتار کرکے ان کے قبضہ سے دو کلو گرام چرس، تھانہ پھندو پولیس نے ملزم سید ولی عرف کاکی ولد شاہ ولی کو گرفتار کرکے اس کے قبضہ سے ایک کلو گرام چرس، تھانہ کوتوالی پولیس نے ملزم شکیل ولد محمد یعقوب کو گرفتار کرکے اس کے قبضہ سے ایک کلوگرام چرس جبکہ ناصر باغ پولیس نے ملزم نصیر خان ولد شاہ نواز کو گرفتار کر کے اس کے قبضہ سے 100 گرام سے زائد ہیروئن برآمد کر لی ہے اسی طرح شہر کے مختلف مقامات پر جرائم پیشہ عناصر کے خلاف کارروائیوں کے دوران 10 دیگر ملزمان کو گرفتار کرکے ان کے قبضہ سے 1 عدد ایم 16 رائفل، 10 عدد پستول ، ایک عدد بندوق اور سینکڑوں عدد مختلف بور کے کارتوس برآمد کر لئے ہیںتمام ملزمان کے خلاف مقدمات درج کرکے مزید تفتیش کے لئے حوالات منتقل کر دیا گیا ہے