سردی آ نہیں رہی، سردی آ گئی ہے، ملک کے شمالی علاقہ جات میں برفباری کا آغاز

اسلام آباد (اُردو پوائنٹ تازہ ترین اخبار۔ 04 اکتوبر 2019ء) سردی آ نہیں رہی، سردی آ گئی ہے، ملک کے شمالی علاقہ جات میں برفباری کا آغاز، ملک کے بیشتر علاقوں میں مسلسل بارش اور ژالہ باری ہونے کا سلسلہ بھی جاری، سلسلہ مزید کئی روز جاری رہنے کا امکان۔ تفصیلات کے مطابق پاکستان میں اس مرتبہ سردی کا موسم وقت سے قبل ہی آ پہنچا ہے۔ پاکستان کے شمالی علاقہ جات میں برفباری کا آغاز ہوگیا ہے۔

شمالی علاقہ جات کے کئی مقامات پر برفباری ہوئی ہے۔ جبکہ دوسری جانب ملک کے مختلف علاقوں میں وفقے وفقے سے بارش کا سلسلہ جاری ہے۔ کراچی، لاہور، پشاورسمیت مختلف شہروں میں بادل برسے، بالائی علاقوں میں پہاڑوں پر ہلکی برف باری ہوگی۔ لاہور سمیت پنجاب کے بیشتر علاقوں میں بادل خوب برسے۔

(جاری ہے)

مختلف شہروں میں ژالہ باری نے سردی کی آمد کا پیغام بھی مل رہا ہے۔

گجرات، وزیرآباد، سانگلہ ہل، پتوکی، مظفر گڑھ اور کوٹ چھٹہ میں بارش کے ساتھ ژالہ باری ہوئی۔ محکمہ موسمیات کے مطابق بارش کا یہ سلسلہ 24 گھنٹے جاری رہ سکتا ہے۔ جبکہ کراچی کے مختلف علاقوں میں بارش کا سلسلہ وقفے وقفے سے جاری ہے، بارش کے باعث کئی علاقوں میں بجلی کی فراہمی بھی معطل ہوگئی۔ لانڈھی، کورنگی، اورنگی ٹاؤن، گلشن اقبال، یونیورسٹی روڈ سمیت کراچی کے مختلف علاقوں میں گرج چمک کے ساتھ موسلادھار بارش کا سلسلہ جاری ہے۔

بارش سے موسم پھر سہانا ہوگیا، تاہم کراچی میں نکاس آب کے بہتر انتظامات نہ ہونے کے باعث شہریوں کو خدشہ ہے کہ سڑکیں تالاب نہ بن جائیں۔ دوسری جانب حیدرآباد میں جمعرات کو شام میں بارش ہوئی جس کے بعد زیادہ تر علاقے گھنٹوں بجلی سے محروم رہے، واسا کا فراہمی و نکاسی آب کا نظام بھی متاثر ہوا ۔ ٹوبہ ٹیک سنگھ، جھنگ، شورکوٹ، بہاولنگر میں موسلادھار بارش ہوئی۔

ننکانہ صاحب، سکھیکی، دینہ، جہلم، پھالیہ اور راجن پور میں بھی بارش نے موسم کو تبدیل کر دیا۔ بارش کے بعد موسم میں ایک دم آنے والی تبدیلی اور ٹھنڈی ہواؤں نے موسم سرما کی نوید سنا دی۔ سرگودھا، قصور، منڈی بہاؤالدین، جلالپور بھٹیاں میں گرج چمک کے ساتھ موسلادھار بارش ہونے کے ساتھ ساتھ پشاور شہر میں بھی بادل برسے جس کے بعد خنکی بڑھ گئی، ڈیرہ اسماعیل خان میں ہلکی بارش جبکہ میر انشاہ میں تیز بارش اور ژالہ باری سے سردی کی شدت میں اضافہ ہوا۔ محکمہ موسمیات کے مطابق آئندہ چوبیس گھنٹے میں موسم کی یہی صورتحال برقرار رہنے کی توقع ہے۔ محکمہ موسمیات نے اپر سندھ میں تیز ہواؤں کے ساتھ بارش کی پیش گوئی کی ہے۔