مختلف علاقوں میں طوفان اور بارش سے 33 فیڈرز سے بجلی کی فراہمی معطل، بارش رکتے ہی بحالی کا کام شروع کردیا گیا ہے، ترجمان فیسکو

مختلف علاقوں میں طوفان اور بارش سے 33 فیڈرز سے بجلی کی فراہمی معطل، بارش ..
فیصل آباد (اُردو پوائنٹ اخبارتازہ ترین - اے پی پی۔ 29 جون2020ء) اتوارو پیر کی درمیانی رات اور پیر کی علی الصبح فیصل آباد، جھنگ، گوجرہ، ٹوبہ ٹیک سنگھ، چنیوٹ،سمندری سمیت ریجن کے مختلف علاقوں میں طوفان اور بارش سے فیسکو کے 33 فیڈرز سے بجلی کی فراہمی معطل ہوگئی تاہم پیر کی صبح بارش رکتے ہی مذکورہ فیڈرز کے متعلقہ علاقوں میں بجلی کی بحالی کا کام شروع کردیا گیاہے۔

(جاری ہے)

فیصل ۱ٓباد الیکٹرک سپلائی کمپنی کے ترجمان نے بتایا کہ مذکورہ علاقوں میں جہاں شدید طوفان بادوباراں سے مختلف فیڈرز میں ٹرپنگ اور فنی خرابی پیدا ہوئی ہے وہاں فیسکو چیف شفیق الحسن کی ہدایت پر آپریشن اورکمپلینٹ سٹاف ہائی الرٹ اور فیلڈ میں موجودہے جبکہ ایگزیکٹو انجینئرز اور ایس ڈی او صاحبان بھی بحالی کے کاموں کی براہ راست خسد نگرانی کررہے ہیں۔

انہوں نے بتایا کہ لائن سٹاف کو بجلی کی بحالی کے کاموں کے دوران سیفٹی اصولوں کی سختی سے پابندی کرنے کی ہدایت بھی کی گئی ہے۔انہوں نے بتایا کہ مختلف علاقوں میں بجلی کی بحالی کا عمل شروع ہوچکا ہے تاہم بجلی کے عارضی تعطل پرفیسکو صارفین سے معذرت خواہ ہے۔انہوں نے بارشوں کے دوران صارفین کو احتیاطی تدابیر اپنانے اور برقی تنصیبات سے دور رہنے کی بھی ہدایت کی ہے۔

Your Thoughts and Comments