حیدرآباد میں آنے والا وقت پاک سرزمین پارٹی کاہے، وفاقی اور صوبائی حکومتیں ناکام ہوچکی ہیں،مصطفی کمال

حیدرآباد(اُردو پوائنٹ اخبارتازہ ترین - این این آئی۔ 26 ستمبر2020ء) پاک سرزمین پارٹی کے چیئرمین سید مصطفی کمال نے کہا ہے کہ حیدرآباد میں آنے والا وقت پاک سرزمین پارٹی کاہے، وفاقی اور صوبائی حکومتیں ناکام ہوچکی ہیں، مردم شماری صحیح نہ ہونے کی وجہ سے ہماری سیٹیں کم ہیں۔اگر مردم شماری صحیح کردی جائے تو وزیراعلیٰ ہمارا آسکتا ہے۔ اگر پیپلزپارٹی ایم کیوایم کو دو وزارتوں کی پیشکش کردے تو آج یہ دونوں بھائی بھائی ہوجائیں گے۔

وہ حیدرآباد کے علاقے پھلیلی تانگہ اسٹینڈ چوک پر ریلی سے خطاب کررہے تھے، اس موقع پر پاک سرزمین پارٹی کے صدر انیس قائم خانی، حفیظ الدین، ضلعی صدر ندیم قاضی اور دیگر نے بھی خطاب کیا، مصطفی کمال نے کہاکہ کراچی کے میئر نے 125 ارب روپے خرچ کئے ان کی لوٹ مار کا وائٹ پیپر جاری کریں گے ، ان کے کالے کرتوت اتنے زیادہ ہیں کہ ان کے ثبوت جمع کرکے ہم تھک گئے ہیں، ہمیں حساب چاہئے ڈرامے بازی نہیں چلے گی۔

(جاری ہے)

انہوں نے کہاکہ میں سندھ کے نوجوانوں، دانشوروں، صحافیوں کو کہتا ہوں کہ وہ پیپلزپارٹی کو سمجھائیں پیپلزپارٹی مہاجروں کے ساتھ تعصب کی بنیاد پر عمل کررہی ہے انہیں ملازمتیں اور تعلیم نہیں دی جارہی ہیں اور نہ ہی ان کے علاقوں سے کچرا اٹھایا جارہا ہے، انہوں نے کہاکہ میں مہاجروںسے بھی کہنا چاہتا ہوں کہ تمہارے ساتھ جو استحصال کررہا ہے وہ سندھی نہیں بلکہ پیپلزپارٹی ہے ، پیپلزپارٹی نے لاڑکانہ اور سندھ کے دیگر علاقوں میں بھی یہی کیا ہے ، تھر میں جو بچے مررہے ہیں وہ بھی سندھی ہیں ، ہسپتالوں میں سندھی بولنے والوں کو بھی ادویات نہیں مل رہی ہے یہ سب ظلم سندھی نہیں بلکہ پیپلزپارٹی کررہی ہے ، پیپلزپارٹی جو ظلم مہاجروں کے ساتھ کررہی ہے وہی سندھیوں کے ساتھ کررہی ہے۔

میں سندھیوں کو دشمن بناکر مہاجروں کو خوش نہیں کرسکتا کیونکہ اس کا فائدہ پیپلزپارٹی کو ہوگا جو صوبے کا نعرہ لگارہے ہیں انہیں صوبہ نہیں بنانا بلکہ ایک منصوبہ بندی کے تحت سب کچھ کرایا جاتا ہے ، لوگ جذباتی ہوکر دھرتی ماں کو توڑنے اور دھرتی ماں کو بچانے میں لگ گئے ہیں اور یہ جماعتیں اپنی کرپشن کو چھپالیں ، انہوں نے کہاکہ آج ایم کیوایم جو صوبے کا نعرہ لگارہی ہے اگر یہی پیپلزپارٹی ان کو دو وزارتوں کی پیشکش کردے تو پھر یہ سب بھول جائیںگے ، ہم نے لوگوں کے زخموں پر مرہم رکھا ہے ، ہم جو انجکشن لگارہے ہیں اس سے ہی لوگ صحت یاب ہوںگے ، چار سالوں میں ہم نے جو بات کی ہے اس میں ہمارا زیر زبر کا بھی فرق نہیں آیا ، ہم نے کوئی یوٹرن نہیں لیا ، انہوں نے کہاکہ ایسا لگتا ہے کہ ہم حیدرآباد اور کراچی میں کسی اور سانحہ کا انتظار کررہے ہیں ، وفاقی اور صوبائی حکومتیں ناکام ہوچکی ہیں ، ان کرپٹ لوگوں کے پیچھے کوئی نوجوان اپنی جان دینے کو تیا رنہیں ہے۔

ہم ان سے پوچھتے ہیں کہ اب کتنے شہداء کے قبرستان اور بناؤ گے ، جو اختیارات اور وسائل وزیراعلیٰ سندھ کو ملے ہیں وہ نچلی سطح تک بھی دیئے جانے چاہئیں۔ مردم شماری صحیح نہ ہونے کی وجہ سے کراچی کی سیٹیں کم ہوئی ہیں ۔