لیبر ڈیپارٹمنٹ کے ڈویلپمنٹ بجٹ میں گزشتہ سال کے مقابلے میں 166فیصد اضافہ ہوا ہے، عنصر مجید

لاہور (اُردو پوائنٹ اخبارتازہ ترین - آن لائن۔ 14 جون2021ء) صوبائی وزیر لیبر عنصر مجید خان نے کہا ہے کہ تاریخ ساز عوامی بجٹ پیش کرنے پر بزدار حکومت اور وزارت خزانہ کو خراج تحسین پیش کرتا ہوں۔یکساں ترقی کی پالیسی پر عمل پیرا ہو کر ہر ضلع کیلئے فنڈز مختص کئے گئے ہیں۔ جنوبی پنجاب کے لیے 189 ارب کے ترقیاتی پیکج سے پسماندہ علاقوں کی محرومیاں دور ہوں گی۔

تعلیم کے بجٹ میں 12.9 فیصد جبکہ صحت کے بجٹ میں 30فیصداضافہ کیا گیا ہے۔19 یونیورسٹیاں،5 زچہ بچہ ہسپتالوں کی تعمیر آئندہ نسلوں کا مستقبل سنواریں گی۔ دیہی معیشت کی بحالی کیلئے بجٹ میں 57 فیصد اضافہ کیا گیا ہے۔ ان خیالات کا اظہار صوبائی وزیر لیبر عنصر مجید خان نے بجٹ 22-2021 کے حوالے سے اپنے اپنے ایک بیان میں کیا۔ صوبائی وزیر لیبر نے کہا کہ لیبر ڈپارٹمنٹ کے ڈویلپمنٹ بجٹ میں گزشتہ سال کے مقابلے میں 166فیصد اضافہ ہوا ہے۔

(جاری ہے)

4 نئی اور 3پہلے سے جاری سکیموں کیلئے 40 کروڑ روپے مختص کئے گئے ہیں۔ انہوں نے کہا کہ پنجاب میں جاب سنٹر کے قیام کیلئے 19 کروڑ 10 لاکھ روپے مختص کئے گئے جبکہ مالی سال 22-2021 میں گھریلو ملازمین کا سروے کروایا جائے گا جس کیلئے 2 کروڑ 50 لاکھ مختص کئے گئے ہیں۔ ڈائریکٹوریٹ آف لیبر ویلفیئر کی نئی عمارت کی تعمیر کیلئے 3 کروڑ 50لاکھ روپے رکھے گئے ہیں۔

Your Thoughts and Comments