ؔکراچی،صوبائی وزیر اطلاعات و بلدیات سندھ سید ناصر حسین شاہ کاکلفٹن ڈرائیو تھرو ویکسینیشن سینٹر کا دورہ

ڑ*کراچی(اُردو پوائنٹ اخبارتازہ ترین - آن لائن۔ 01 اگست2021ء) صوبائی وزیر اطلاعات و بلدیات سندھ سید ناصر حسین شاہ نے کلفٹن ڈرائیو تھرو ویکسینیشن سینٹر کا دورہ کیا۔ اس موقع پر پارلیمانی سیکریٹری برائے صحت قاسم سومرو ، ڈپٹی کمشنر جنوبی ارشاد سوڈھر و دیگر بھی ان کے ہمراہ تھے۔انہوں نے سینٹر میں سہولیات کا جائزہ لیا اور ویکسین کے لئے آنے والے شہریوں سے معلومات لیں۔

اس موقع پر صوبائی وزیر نے کہاکہ 18 جولائی سے ڈرائیو تھرو سینٹر شہریوں کو سہولت فراہم کر رہا ہے اور جے ایس بینک کے تعاون سے سندھ حکومت نے یہ ویکسینیشن سینٹر قائم کیا ہے۔انہوں نے کہاکہ جے ایس بینک کی خدمات کو سراہتے ہیں،بڑی تعداد میں فیملیز اس سینٹر پر ویکسینیشن کے لیے آ رہے ہیں۔صوبائی وزیر اطلاعات سید ناصر حسین شاہ نے مزید کہاکہ فیملیز کے رش کو دیکھتے ہوئے ، کاونٹرز میں اضافہ کر دیا کیا گیا ہے تاکہ زیادہ سے زیادہ شہریوں کو کم وقت میں ویکسین کی سہولت فراہم کی جا سکے۔

(جاری ہے)

انہوں نیکہاکہ جے ایس بینک اور دیگر اداروں کے تعاون سے شہر میں مزید ڈرائیو تھرو ویکسین کی سہولت قائم کر رہے ہیں۔ انہوں نے کہا کہ ڈیلٹا جیسے مہلک وائرس سے محفوظ رہنے کے لیے ویکسینیشن ہی بہترین تدبیر ہے۔ سید ناصر حسین شاہ نے کہاکہ شہری کرونا ایس او پیز پر عمل کریں، خود بھی محفوظ رہیں اور شہر کو بھی محفوظ بنائیں۔ انہوں نے کہاکہ سخت فیصلے لوگوں کی زندگیاں بچانے کے لیے کئے ہیں۔

انہوں نے کہا کہ پورے صوبے میں ویکسینیشن سینٹرز کی تعداد میں اضافہ کیا جا رہا ہے۔ آج کراچی کے 6 اضلاع کے 11 سینٹرز کو ماس ویکسینیشن سینٹرز کا درجہ دے دیا گیا ہے جو کہ 24 گھنٹے کام کرتے رہیں گے، جن میں ڈاؤ اوجھا کیمپس، خالق ڈنو ہال، جی پی ایم سی ، لیاری جنرل ہسپتال، چلڈرن ہسپتال ضلع وسطی ، لیاقت آباد اور نیو کراچی سندھ گورنمنٹ ہسپتال،سندھ گورنمنٹ قطر ہاسپٹل، مراد میمن گوٹھ ہسپتال، کورنگی 5 ہسپتال اور سعود آباد سندھ گورنمنٹ ہسپتال شامل ہیں۔

Your Thoughts and Comments