عزاداروں کو بہترین سہولیات کی فراہمی انتظامیہ کی اولین ترجیح ہے‘کمشنر سرگودھا ڈویژن

سرگودھا(اُردو پوائنٹ اخبارتازہ ترین - این این آئی۔ 05 اگست2021ء) کمشنر سرگودھا ڈویژن نے کہا ہے کہ عزاداروں کو بہترین سہولیات کی فراہمی انتظامیہ کی اولین ترجیح ہے ۔ تمام ادارے ایک مربوط پلان کے تحت اپنی ذمہ داریوں کو احسن طریقہ سے ادا کریں۔عزاداری جلوسوں اور روٹس کاتمام محکمے مل کر معائنہ کریں اور حائل ہونے والی رکاوٹوں کو فوری دور کیا جائے۔

زرائع کے مطابق کمشنر ڈاکٹر فرح مسعود نے عزاداری جلوسوں اورمجالس کے حوالہ سے منعقدہ اجلاس سے خطاب کرتے ہوئے کہا کہ سی اوایم سی کو تمام روٹس پر لائٹس کو فنکشنل کرنے ‘ سیوریج کے مسائل کو حل کرنے ‘ کھلے مین ہولز کے ڈھکن رکھنے کیلئے چھ دن کی مہلت دی ۔ انہوں نے مجالس کے مقامات اور جلوسوں کے روٹس کی صفائی ستھرائی کیلئے خصوصی ٹیمیں تشکیل دینے کی ہدایت کی ۔

(جاری ہے)

اس طرح روٹس پر سڑکوں کے پیچ ورک کرنے اور ایسی گلیاں جہاں بارش ہونے کی صورت میں پانی کھڑا ہونے کا اندیشہ ہو وہاں پر پہلے سے ہی خاکہ ڈالنے کی ضرورت پر زور دیا۔کمشنر نے شہر بھر کا سروے کر کے جہاں کئی وال چاکنگ ہو اسے فوری ختم کرنے ‘ گندگی کے ڈھیروں اور تعمیراتی میٹریل کو فوری اٹھانے کی ہدایت کی ۔ انہوں نے کہا کہ عزاداری جلوسوں کے روٹس پر عشرہ محرم کے دوران ہر قسم کی تعمیرات پر پابندی لگائی جائے ۔

انہوں نے ٹریفک پولیس کو عشرہ محرم کے دوران ٹریفک کی روانی کیلئے مربوط پلان تشکیل دینے کی ضرورت پر زور دیا ۔انہوں نے ایم سی کو شہر کے دو امام بارگاہوں میں بڑے جنریٹرز رکھنے کے احکامات بھی جاری کئے تاکہ بجلی کی بندش کی صورت میں عزاداروں کو کسی قسم کے مسائل کا سامنانہ کرناپڑے اور انہیں فوری متبادل ذریعہ سے بجلی کی فراہمی یقینی بنائی جائے ۔

انہوں نے تمام محکموں کو کنٹرول روم قائم کرنے نیز افسران او رعملہ کی ڈیوٹیاں لگانے کی ہدایت کی ۔ انہوں نے لائسنس ہولڈرز پر واضح کیا کہ جلوسوں کے روٹس اورٹائمنگ میں کوئی تبدیلی نہیں ہوگی ۔ مجالس اورجلوسوں میں انسداد کرونا ایس او پیز پر سختی سے عمل درآمد کروایاجائیگا ۔ انہوں نے عزاداروں پر بھی زور دیا کہ وہ اپنے گردونواح میں خاص نظر رکھیں اور ایسی کوئی مشکوک سرگرمی محسوس کریں تو سیکورٹی وانتظامی اداروں کو بروقت اطلاع دیں ۔

انہوں نے اسسٹنٹ کمشنر سرگودہا عمر دراز گوندل کو عزاداروں کے اقابرین سے مل کر تمام انتظامی مسائل کو جلد سے جلدحل کرنے ‘انہیں رپورٹ پیش کرنے کی ہدایت کی ۔ اجلاس میں ڈپٹی کمشنر نائلہ باقر نے ضلع بھر میں عشرہ محرم کے دوران منعقدہونے والی مجالس اور عزاداری جلوسوں کے حوالے سے کئے گئے انتظامی اقدامات بارے تفصیلی بریفنگ دی۔بعد ازاں کمشنر ڈاکٹر فرح مسعود کی زیر صدارت ایک اور انتظا می اجلاس منعقد ہوا۔

کمشنر نے فیسکو افسران کو ہدایت کی کہ وہ عزاداری جلوسوں پر لٹکتی بجلی کی تاروں کو فوری درست کریں‘ لائٹس کو فنکشنل کیاجائے ۔ انہوں نے سوئی گیس افسران کو روٹس پر اپنی لائنوں کااز سر نو سروے کرنے کی بھی ضرورت پر زور دیا تاکہ کسی جگہ کوئی لیکج ہو تو فوری درست کی جائے ۔ انہوں نے این ٹی سی حکام کو روٹس پر ٹیلی فون کی تاروں کاسروے کرنے ‘ لٹکتی تاروں کو فوری ہٹانے کی بھی ہدایت کی ۔

انہوں نے پیمرا حکام کو محرم الحرام کے دوران کیبل نیٹ و رک پر خاص نظر رکھنے کی ضرور ت پر زور دیا ۔ انہوں نے کہاکہ کسی متنازعہ شخص کی سی ڈی چلانے کی اجازت نہیں ہو گی ۔ اس طرح ایسے علمائے کرام وذاکرین جن پر پابندی عائد ہے ان کی کوئی بھی تقریر وغیرہ کسی بھی کیبل پر نہیں چلائی جائیگی۔ انہوںنے کہا کہ پیمرا کیپلز پر امن ‘ بھائی چارے ‘رواداری اوربرداشت کے پرچار والے ٹکرز اورپیغام کو عام کرے۔

انہوں نے ڈائریکٹر تعلقات عامہ کوچھاپہ خانوں پر بھی خاص نظر رکھنے کی ہدایت کی تاکہ کوئی اشتعال انگیز پمفلٹ یا اشتہار شائع نہ ہو۔اس طرح الیکٹرانک او رپرنٹ میڈیا پر بھی محبت بھائی چارے اور اخوت والے اشتہارات وپیغامات کو عام کرنے کی ضرورت پر زور دیا ۔ انہوں نے کہاکہ تمام محکمے مل کر ایک سکواڈ تشکیل دیں جو عزاداری جلوسوں کے ساتھ چلے او راگر کسی جگہ کوئی مسئلہ محسوس ہو تو موقع پر حل کیاجائے۔اجلاس میں شریک افسران نے محرم الحرام کے حوالہ سے کئے گئے اقدامات بارے تفصیلی بریفنگ دی ۔