پیپلزپارٹی کی جانب سے آج ملک بھر میں ڈویژنل سطح پرکسان ٹریکٹر ٹرالی مارچ کا انعقاد کیاجائیگا

بلاول بھٹو زرداری حیدرآباد میں اسٹیٹ لائف بلڈنگ کے قریب ٹھنڈی سڑک پرٹریکٹرٹرالی مارچ کے شرکاء سے خطاب کریں گے

کراچی(اُردو پوائنٹ اخبارتازہ ترین - این این آئی۔ 23 جنوری2022ء)پاکستان پیپلزپارٹی کی جانب سے آج(پیر)24جنوری کوملک بھر میں ڈویژنل سطح پرکسان ٹریکٹر ٹرالی مارچ کا انعقاد کیاجائے گا۔بلاول ہائوس میڈیا سیل جاری اعلامیہ کے مطابق پیپلزپارٹی کے چیئرمین بلاول بھٹو زرداری حیدرآباد میں دوپہر تین بجے اسٹیٹ لائف بلڈنگ کے قریب ٹھنڈی سڑک پر مختلف شہروں اور تحصیلوں سے آنے والی ریلیوں کے اجتماع سے خطاب کریں گے۔

(جاری ہے)

اعلامیہ کے مطابق بلاول بھٹو زرداری حیدرآباد ڈویژن میں کسان ٹریکٹر ٹرالی مارچ سے خطاب کے بعد لاڑکانہ روانہ ہوجائیں گے جہاں وہ اگلے روز لاڑکانہ شہر میں 25جنوری بروز منگل کچی آبادیوں کو مالکانہ حقوق دینے کے حوالے سے ہونے والی تقریب سے خطاب کریں گے۔26جنوری بروز بدھ کوچیئرمین پیپلزپارٹی لاڑکانہ شہر میں سندھ سالڈ ویسٹ مینجمنٹ کے منصوبے کے افتتاح کے بعد میڈیا سے بات چیت بھی کریں گے۔