پنجاب سمیت ملک کے بیشتر حصوں میں دھند کا سلسلہ برقرار ،سردی کی شدت میں بھی اضافہ ریکارڈ

لاہور /اسلام آباد /راولپنڈی /فیصل آ باد /ملتان /گوجرانوالہ /سیالکوٹ /گلگت بلتستان ( اُردو پوائنٹ تازہ ترین اخبار۔ 06 جنوری 2015ء) پنجاب سمیت ملک کے بیشتر حصوں میں دھند کا سلسلہ برقرار ہے جس کی وجہ سے سردی کی شدت میں بھی اضافہ ریکارڈ کیا گیا ، شدید دھند کے باعث لاہور ایئرپورٹ پر فلائٹ آپریشن معطل ہو گیا جس کے باعث مسافروں کو شدید مشکلات کا سامنا کرنا پڑا ، موٹر وے پر کئی مقامات پر حد نظر نہ ہونے کی وجہ سے بھاری گاڑیوں کا داخلہ بند جبکہ چھوٹی گاڑیوں کو قافلوں کی صورت چلایا جا رہا ہے جبکہ گلگت بلتستان اور چترال میں وقفے وقفے سے جاری برفباری سے رابطہ سڑکیں بند ہوگئیں جس سے لوگوں کی مشکلات میں اضافہ ہوگیا ہے۔

تفصیلات کے مطابق ملک کے میدانی اور شہری علاقے گزشتہ روز بھی شدید دھند کی لپیٹ میں رہے ، شہر اقتدار سمیت راولپنڈی اور اس سے ملحقہ علاقوں میں دھند اور سخت سرد موسم نے زندگی منجمد کر رکھی ہے ۔

(جاری ہے)

رات کے پچھلے پہر چھانے والے دھند کے بادلوں نے باغوں کے شہر لاہور کو تاحال اپنی آغوش میں لے رکھا ہے۔ ٹھنڈی ہواں کے سبب موسم میں تا حال کوئی تبدیلی نہیں آئی ۔

دھند کے باعث ایئر پورٹ پر فلائٹ آپریشن معطل ہے جس کی وجہ سے اندرون اور بیرون ملک پروازوں کی روانگی میں تاخیر ہو رہی ہے ۔ نجی ٹی وی کے مطابق لاہور ائیرپورٹ پر دوپہر 12بجے کے بعد فلائٹ آپریشن بحال ہونے پر 6بین الاقوامی پروازوں کی آمد کے باعث ائیرپورت لاؤنج مسافروں سے بھر گئے ۔ رش کے باعث مسافروں کو سامان لینے میں بھی مشکلات کا سامنا کرنا پڑا ۔

جبکہ ترجمان موٹروے کے مطابق موٹر وے پر کئی مقامات پر حد نظر نہ ہونے کی وجہ سے بھاری گاڑیوں کا داخلہ بند کر دیا گیا جبکہ چھوٹی گاڑیوں کو قافلوں کی صورت چلایا جا رہا ہے ۔ ملتان اور گردنواح میں دھند نے ہر چیز دھندلا کر رکھ دی ہے ۔ شہری علاقوں میں حد نگاہ 20میٹر جبکہ دیہی علاقوں میں حد نگاہ صفر رہ گئی ۔ گزشتہ روز صبح گوجرانوالہ ، بہاولپور ، گجرات ، سیالکوٹ ، فیصل آباد ، اوکاڑہ ، ساہیوال ، وہاڑی اور دیگر علاقوں میں حد نظر انتہائی کم رہا ۔

سندھ کے میدانی علاقوں کے علاوہ شہری حصے بھی متاثر رہے ۔ دوسری طرف ملک بھر میں شدید سردی کی لہر بھی جاری ہے۔ گزشتہ روز سب سے زیادہ ٹھنڈ پارا چنار میں پڑی جہاں پارہ منفی سات سینٹی گریڈ تک گر گیا ۔ گوپس ، ہنزہ ، استور ، راولا کوٹ اور چترال میں بھی درجہ حرارت نقطہ انجماد سے نیچے رہا۔گلگت بلتستان میں غذر، استور اور ہنزہ نگر سمیت مختلف علاقوں میں 2روز سے وقفے وقفے سے برفباری کا سلسلہ جاری ہے۔

برفباری کے باعث متعدد رابطہ سڑکیں بند ہوگئی ہیں جس سے لوگوں کی مشکلات میں اضافہ ہوگیا ہے۔ چترال کے سب ڈویژن مستوج کے ہیڈکوارٹر بونی میں برفباری کے بعد موسم شدید سرد ہوگیا ہے۔ گزشتہ روز سب سے کم درجہ حرارت پاراچنارمیں منفی سات ڈگری سینٹی گریڈ ریکارڈ کیا گیا۔ گوپس میں منفی چھ، سکردو منفی پانچ، مالم جبہ، ہنزہ منفی چار، قلات منفی دو، استور اور راولا کوٹ میں منفی ایک ڈگری سینٹی گریڈ ریکارڈ کیا گیا۔

محکمہ موسمیات نے پنجاب کے میدانی علاقوں میں دھند کی شدت برقرار رہنے کی پیش گوئی کی ہے۔محکمہ موسمیات کے مطابق ملک کے بیشتر علاقوں میں موسم شدید سرد اور خشک رہے گا۔ بالائی علاقوں میں بادل چھائے رہنے کی توقع ہے۔ گلگت بلتستان اور مالاکنڈ ڈویژن کے کچھ علاقوں میں ہلکی بارش اور برفباری کا امکان ہے۔