عراق ، باپ نے یوٹیوبر بیٹی کو غیرت کے نام پر قتل کردیا

یوٹیوبر عام زندگی میں ہونے والے کاموں کی ویڈیوز بناتی تھیں ،اکثر منگیتر بھی ساتھ دکھائی دیتے تھے

پیر 6 فروری 2023 18:42

بغداد(اُردو پوائنٹ اخبارتازہ ترین - این این آئی۔ 06 فروری2023ء) عراق میں باپ نے اپنی22سالہ یوٹیوبر بیٹی کو غیرت کے نام پر قتل کردیا ۔غیر ملکی خبر ایجنسی کی رپورٹ کے مطابق طیبہ العلی کی باپ کے ہاتھوں موت کی تصدیق عراقی وزارت داخلہ کے ترجمان سعد مان کی جانب سے کی گئی جنہوں نے بتایا کہ طیبہ العلی ترکی میں مقیم تھیں اور ان دنوں وہ عراق آئی ہوئی تھیں۔

(جاری ہے)

ترجمان کے مطابق مذکورہ واقعہ31جنوری کو پیش آیا، باپ اور بیٹی کے درمیان ہونے والی گفتگو کی کچھ ریکارڈنگز پولیس کو برآمد ہوئیں جس سے پتا چلتا ہے کہ طیبہ کے والد اس کے ترکیہ میں تنہا رہنے پر رضامند نہیں تھے اور ناخوش بھی تھے۔رپورٹس کے مطابق پولیس ذرائع نے انکشاف کیاکہ مقتولہ یوٹیوبر2017میں اپنے خاندان کیساتھ ترکیہ گئی تھیں لیکن پھر انہوں نے واپس عراق جانے سے انکار کردیا اور ترکیہ میں رہنے کی خواہش ظاہر کی۔

بتایا گیاکہ یہ خاندانی جھگڑا2015سے چلتا آرہا تھا جو اب طیبہ کی موت کے ساتھ اختتام پذیر ہوگیا۔طیبہ العلی کے یوٹیوب پر بے شمار فالوورز تھے جنہوں نے طیبہ کی موت پر غصے کا اظہار کیا ہے۔یوٹیوبر عام زندگی میں ہونے والے کاموں کی ویڈیوز بناتی تھیں جن میں اکثر ان کے منگیتر بھی دکھائی دیتے تھے۔