Aroosi Malbosat Ke Naye Chalan - Article No. 2741
عروسی ملبوسات کے نئے چلن - تحریر نمبر 2741
روایتی پہناوے جدید طرز سے ہم آہنگ ہونے لگے
پیر 22 نومبر 2021
شادی کی تقریب کو یادگار بنانے کے لئے عروسی ملبوسات کی تیاری پر خصوصی توجہ دی جاتی ہے،تاکہ وہ پوری محفل میں یکتا دکھائی دے،گزشتہ چند برسوں میں اسی وجہ سے جہاں فیشن کی صنعت میں تیزی سے بدلاؤ آیا ہے،وہیں عروسی ملبوسات بھی اب گنی چنی بندشوں سے آزاد ہو چکے ہیں اور اب ان میں بھی کافی تنوع نظر آ رہا ہے۔ماضی میں دلہنوں کا لباس گوٹا لگے ہوئے سرخ رنگ کے بنارسی غرارے،سرخ چمک دار ساٹن کی اونچی قمیض اور ٹشو یا جارجٹ کے دوپٹے پر مشتمل ہوتا تھا،جس کی کناری پر گوٹا اور کرن وغیرہ لگائی جاتی تھی۔تاہم شادی بیاہ کی تقریبات میں وقت کے حساب سے جو تبدیلی آئی،تو عروسی ملبوس نے بھی فیشن کی دنیا میں دھوم مچا دی۔اب دلہنیں،باقاعدہ ڈیزائنرز کی خدمات لے کر اپنا لباس ڈیزائن کرواتی ہیں۔
(جاری ہے)
غرارہ
اب ہمارے ہاں عروسی ملبوسات مخصوص رنگوں کی بندش سے آزاد ہو چکے ہیں۔آج کل بھاری کام بنوانے کی جگہ لباس کے کٹس پر زور دیا جا رہا ہے،اسی لئے ڈیزائنرز دلہن کے علاوہ بھی خواتین اور لڑکیوں کے حساب سے مختلف رنگوں،سفید،گلابی فیروزی پرپل،گرے،رسٹ، گرین وغیرہ اور اسٹائلش ڈیزائن کے ساتھ منفرد غرارے متعارف کرا رہے ہیں،جن پر پرل،کرسٹل دبکہ،تلہ اور دیگر کام کیے جاتے ہیں۔ یہ لباس اتنے خوبصورت ہیں کہ دیکھنے والا لمحہ بھر کو مبہوت ہو کر رہ جاتا ہے۔قیمتی ملبوسات کی تیاری میں روایتی انداز کے ساتھ ساتھ جدت کو بھی مدنظر رکھا جا رہا ہے۔چھوٹی قمیضوں کے علاوہ لمبی کھلی چاک والی قمیض بھی غراروں کے ساتھ بہت دیدہ زیب لگتی ہیں۔اب تو ہر رنگ کا گوٹا بھی دستیاب ہے۔ایسے قیمتی ملبوسات پر گوٹے کے کام کی مانگ بڑھ رہی ہے،جو دیکھنے میں بہت بھلا لگتا ہے۔اس کے علاوہ ڈھاکا پائجامہ،کیولٹس،کم گھیر اور ڈبل فرل والے غرارے بھی بہت پسند کیے جا رہے ہیں۔پہلے کام دار یا بھری ہوئی قمیضوں کا فیشن عروج پر تھا،مگر اب غراروں کی قمیضوں پر گلے آستین یا فرنٹ اوپن شیپ میں کام کروایا جا رہا ہے۔دوپٹے کی ماتھا پٹی بھاری کام دار ہوتی ہے،کناروں پر پتلی بیل سے اسے سجایا جاتا ہے،اس کے علاوہ جالی کے دوپٹوں پر نفیس کام بھی دلہنوں کے لباس کا حصہ ہیں۔
شرارے
ملبوسات کی اب اپنی دنیا اور منفرد پہچان بن چکی ہے،درزیوں کی جگہ ڈیزائنرز نے لے لی ہے،چھوٹی چھوٹی دکانوں سے نکل کر یہ فیشن ایبل بوتیک تک چلے گئے ہیں،یہ کہا جائے،تو غلط نہیں ہو گا کہ ملبوسات کی تیاری گلی محلوں تک محدود نہیں رہی،بلکہ دھیرے دھیرے ایک صنعت کا روپ دھار چکی ہے،جو بے انتہا گلیمرس اور اسٹائلش پوشاک متعارف کرانے کا کام سر انجام دے رہے ہیں۔شراروں کی اتنی اقسام دستیاب ہیں کہ خریدنے والا شش و پنچ میں مبتلا ہو جاتا ہے کہ کیا خریدے اور کیا نہیں؟ایک نیا رجحان جو عروسی لباس میں دکھائی دے رہا ہے، وہ مغربی اور مشرقی انداز کا امتزاج ہے،اس وجہ سے ان میں بے تحاشا اقسام مل جاتی ہیں،جیسے شراروں کے ساتھ گاؤن چل رہے ہیں،جن پر نگوں کا نفیس کام اپنی بہار دکھا رہا ہے۔بغیر آستینوں کے کوٹ اور بھاری کام دار لانگ ٹیل شرٹ بھی شراروں کی دیدہ زیبی کو بڑھا رہے ہیں۔”ڈراپ کارنر“ کے بعد ”فرنٹ ڈراپ“ قمیضوں کا رواج بھی مقبول ہو رہا ہے۔اس وجہ سے روایتی لباسوں کا ایک جدید انداز سامنے آیا ہے۔اس کا فائدہ یہ ہے کہ لباس اب صرف عروسی ملبوس نہیں رہے،بلکہ عام لڑکیاں بھی اسے پہن رہی ہیں۔شام کی تقریبات کے حساب سے سنہری،چمکتے دمکتے شرارے قریبی رشتے دار خواتین اور کزن کے لئے متعارف کرائے گئے ہیں۔مغربی رجحان کو ذہن میں رکھتے ہوئے غرارے یا شرارے کے ساتھ میکسی اور جالی کا دوپٹہ پہنا جا رہا ہے۔بنارسی پٹیاں لگا کر شراروں کی زیبائش بڑھائی جا رہی ہے، ان پر نفاست سے کیا گیا کام لباس کی خوبصورتی کو اُجاگر کرتا ہے۔ڈیزائنرز شراروں،غراروں پر کندن،پرل،کورے دبکے اور ڈائمنڈ کے کام کرواتے ہیں،جو بہت دنوں تک خراب نہیں ہوتا۔
لہنگا
آج کل لہنگوں میں کام دانی اور فرنچ کام پسند کیا جا رہا ہے۔مغربی انداز کی لمبی اور چھوٹی میکسی لہنگوں کے ساتھ بنوائی جا رہی ہیں،جو جدت اور روایت کا ایک اچھا امتزاج ہے۔ہلکے اور گہرے رنگ کے لہنگوں کے ساتھ کام والے دوپٹے،چوڑے یا پتلے بارڈر پر باریک نفیس کام بھی فیشن میں ہیں۔بازار میں ایسے ایسے کام دار شرارے،لہنگے اور غرارے دستیاب ہیں کہ دیکھنے والوں کی نگاہیں ان پر سے نہیں ہٹتیں،یہی وجہ ہے کہ ہماری آج کل کی دلہنیں اس بدلتے ہوئے رواج سے استفادہ کرتی ہوئی نظر آ رہی ہیں۔
Browse More Clothing Tips for Women
گلابی رنگ کا انتخاب کریں
Gulabi Rang Ka Intekhab Karen
موسمِ سرما میں دیسی ملبوسات کے ٹرینڈز
Mausam E Sarma Mein Desi Malbosat Ke Trends
پشمینہ اور مخمل کی شال
Pashmina Aur Makhmal Ki Shawl
میکسی اور گاؤن
Maxi Aur Gown
فلورل فراک اور میکسی
Floral Frock Aur Maxi
پیلے رنگ کا انتخاب کریں
Peele Rang Ka Intikhab Karen
کالے رنگ کا سحر کبھی نہ ٹوٹ سکا
Kale Rang Ka Sehar Kabhi Na Toot Saka
سیاہ لباس کے ساتھ جوتوں اور جیولری کا بھی خیال رکھیں
Siyah Libas Ke Sath Jooton Aur Jewelry Ka Bhi Khayal Rakhain
تر و تازہ چہرہ اور دلکش ملبوسات
Tar O Taza Chehra Aur Dilkash Malbosat
سرخ قرمزی رنگ شاہانہ شخصیت کا آئینہ دار
Surkh Qarmazi Rang Shahana Shakhsiyat Ka Aaina Dar
دھنک رنگ پہناوے
Dhanak Rang Pehnawe
کُرتا اینڈ چُوڑی دار پاجامہ
Kurta And Churidar Pajama