Doraan E Hamal Maan Ki Sehat Bakash Gazaain - Special Articles For Women

دوران حمل ماں کی صحت بخش غذائیں - خواتین کیلئے مضامین

بدھ فروری

Doraan E Hamal Maan Ki Sehat Bakash Gazaain
ماں بننے کا عمل جہاں عورت کے لئے خوش گوار ہوتا ہے وہیں اس کو اپنی خوراک کا بھی اتنا ہی خیال رکھنا پڑتا ہے کیونکہ ماں کو اپنی ضروریات کے ساتھ بچے کی نشوونما کے لئے بھی غذائیت بھری خوراک درکار ہوتی ہے۔صحت بخش متوازن غذا انسان کو صحت مند اور توانا رکھتی ہے۔ ماں بننے والی خواتین کے لئے غذا کی اہمیت اس لئے بھی بڑھ جاتی ہے کیونکہ ماں جیسی غذا لے گی اس کا براہ راست اثر اس کے پیدا ہونے والے بچے پر ہو گا۔

ضروری ہے کہ ماں کو صحت مند اور کیلوریز سے بھرپور غذا دی جائے تاکہ ہونے والا بچہ صحت مند جسم اور ذہن کے ساتھ پیدا ہو۔ہر حاملہ خاتون کو روزانہ تقریباً تین سو کیلوریز کی ضرورت ہوتی ہے۔حاملہ خاتون کون سی غذا روزانہ لے اور وہ کیا احتیاطی تدابیر اپنائے جس سے وہ اور اس کا آنے والا بچہ صحت مند رہیں۔

(جاری ہے)


حاملہ خواتین کو اپنی غذا میں پروٹین والی غذاؤں کا استعمال بھی کرنا چاہیے کیونکہ پروٹین بچے کی نشوونما کے لئے ضروری ہے ۔

اس کے لئے دودھ،دہی ،انڈا،دالیں اور گوشت کا استعمال کر سکتی ہیں۔
حاملہ خواتین کو وٹامن اے،وٹامن ڈی،وٹامن سی اور وٹامن ای کی ضرورت ہوتی ہے ان وٹامنز کو پھلوں اور سبزیوں(پتے والی سبزی)کے استعمال سے حاصل کیا جا سکتا ہے۔پالک کا استعمال آئرن کی کمی کو پورا کرے گا اور خواتین کو قبض جیسے مسائل سے بھی محفوظ رکھے گا۔آج کل مالٹا،کینو اور موسمی با آسانی دستیاب ہیں ان میں سے کوئی ایک پھل روزانہ کھائیں۔


دوسری غذا کے ساتھ ساتھ سردیوں میں مچھلی بھی کھائیں تاکہ جو اضافی چکنائی کی ضرورت پڑتی ہے وہ پوری ہو جائے ۔
حاملہ خاتون کو سرد موسم میں کم از کم چھ گلاس پانی روزانہ پینا چاہیے لیکن اگر موسم گرم ہو تو آٹھ سے دس گلاس پانی روزانہ پئیں۔
حمل کے دوران خواتین کو تمباکو نوشی،کافی اور زیادہ چائے وغیرہ نہیں لینی چاہئیں۔
عام دنوں اور حمل کے دوران بھی خود سے کسی بھی دوا کا استعمال نہ کریں جو دوا بھی لینی ہو ڈاکٹر کے مشورہ سے ہی لیں۔


حاملہ خواتین باہر کے کھانوں سے اجتناب کریں گھر میں صحت مند غذا کا بندوبست کریں۔چہل قدمی بھی کریں جو کہ بچے کی پیدائش کے وقت آسانی کا باعث بنتی ہے۔اگر حاملہ خاتون کی خوراک پر دھیان نہ دیا جائے تو اس سے حمل کے ضائع ہونے کا بھی اندیشہ رہتا ہے۔ اس کے علاوہ پیدا ہونے والا بچہ کمزور اور کم وزن ہو سکتا ہے۔خدا نخواستہ اسے کوئی معذوری بھی ہو سکتی ہے۔

پیدا ہونے والا بچہ ماں کی غذا سے ہی اپنی ضرورت پوری کرتا ہے اس لئے حاملہ خواتین حمل کے دوران متوازن غذا لیں اور حمل کے بعد بھی اپنی خوراک کا دھیان رکھیں تاکہ دودھ پلانے کے دوران بھی وہ صحت مند ہوں۔
خشک خوبانی
یہ خشک پھل آئرن کے حصول کا ایک اچھا ذریعہ ہے۔یہ بلڈ شوگر کی صحت مند سطح کو برقرار رکھنے میں مفید ہو سکتا ہے۔

خشک خوبانی دودھ پلانے والی ماؤں کے لئے بھی مفید ہے۔حمل کے دوران اکثر خواتین آئرن کی کمی میں مبتلا ہو جاتی ہیں اور خشک خوبانی آئرن کی کمی کو پورا کرنے میں معاون ہے۔
سونف کے بیج
سونف کے بیج ہاضمے کو بہتر بنا سکتے ہیں۔حمل کے دوران سینے کی جلن اور تیزابیت جیسے مسائل عام ہیں۔غذا میں سونف کے بیجوں کو شامل کرنا ان علامات میں مفید بتائے جاتے ہیں۔


بادام
بادام ایک صحت مند گری دار میوہ ہے۔یہ وٹامن ای کا بھرپور ذریعہ ہیں۔بادام میٹا بولزم کو بڑھا سکتے ہیں اور بچے کے دماغ کی نشوونما میں بھی مدد کر سکتے ہیں۔
دیگر کھانے کی اشیاء جو حاملہ خواتین کے لئے مفید ہیں
حمل کے دوران خواتین کو پروٹین،وٹامنز،معدنیات اور فائبر سے بھرپور غذا کا انتخاب کرنا چاہیے۔

یہاں کچھ کھانے کی اشیاء ہیں جو خواتین کو حمل کے دوران ضرور کھانی چاہئیں۔
دودھ،دہی،پنیر اور دیگر ڈیری مصنوعات۔
دال اور پھلیاں۔
شکر قندی۔
انڈے۔
سبز پتوں والی سبزیاں۔
بیریز۔
اناج۔
خشک میوے۔
ان کھانوں کے علاوہ یہ ضروری ہے کہ حاملہ خواتین قبض اور انفیکشن جیسے مسائل سے محفوظ رہنے کے لئے پانی کا استعمال زیادہ کریں۔
تاریخ اشاعت: 2021-02-10

Your Thoughts and Comments

Special Special Articles For Women article for women, read "Doraan E Hamal Maan Ki Sehat Bakash Gazaain" and dozens of other articles for women in Urdu to change the way they live life. Read interesting tips & Suggestions in UrduPoint women section.